(නිකවැරටිය - ප්‍රියාණි මංගලිකා)
රාත්‍රී කාලයේ කාන්තා යට ඇඳුම් සොයා යන තරුණයකුට නිවසක් තුළ නින්ද යාමෙන් සිදුවූ අලකලංචියක් නිකවැරටියට ආසන්න පෙදෙසකින් වාර්තාවිය.


සිද්ධිය මෙසේය.


මෙම තරුණයා කලක සිට මෙම ක්‍රියාවට ඇබ්බැහිවී සිටින අයෙකි. ඔහු විවාහවී පිටස්තර ප්‍රදේශයකට ගියද වරින්වර ගමට පැමිණ රාත්‍රියේ ගෙවල් කීපයකට ගොස් මෙලෙස කාන්තා යට ඇඳුම් සොරා ගැනීම සිදු කරයි.


සිද්ධිය වූ දින රාත්‍රියේදී ගමට පැමිණි තරුණයා එදා ද සුපුරුදු ක්‍රියාවේ නිරත විය. නිවෙස් කීපයකට ගියද ඔහුගේ අරමුණ ඉටු නොවුණ විට නිවැසියන් නොමැති නිවසක ජනේලයක් කඩා නිවසට ඇතුළුවී ඇත. මෙම නිවසේ වෙසෙන මව සහ තරුණ දියණිය මෙදින නිවසින් බැහැරව ගොස් සිටි අතර කිසිවකු නොමැති නිවසේ සිත් සේ ඇවිද යමින් මවගේ සහ දියණියගේ ඇඳුම්ද රැගෙන ඇඳට වී නිදාගෙන ඇත.


අඩියක්ද ගසා සිටි තරුණයාගේ අරමුණු ඉටුවීමේ සතුටද සමග ඔහුට තදින්ම නින්ද ගියේ ඔහුටද නොදැනීමය. පසු දිනට පහන්වුවද තරුණයා අවදි නොවූ අතර නිවසින් බැහැරව සිටි නිවැසියෝද නිවසට පැමිණියහ.


ඔවුන් නිවසට ඇතුළුවී බලන විට තරුණයකු තම ඇඳ මත තද නින්දේ පසුවන අයුරු දැක ඇත. බිය වූ නිවැසියන් ඥාතීන්ට සහ අසල්වැසියන්ට දැනුම්දීමෙන් පසු ගුටි පූජාවකින්ද සංග්‍රහ ලැබ පොලිස් කූඩුවේද ලගින්නට සිදු විය. අනතුරුව ගෙවල් බිඳුම් චෝදනා මත අධිකරණයේ නඩුවක්ද පැවැරිණි.