අතුරුදන්ව සිටි තරුණියක රිළවෙකුත් සමග වගා ළිඳකින් මතුවීමේ සිද්ධියක් ගල්ගමුව පොලීසියෙන් දැන ගැනීමට ලැබිණ.


පොලිසිය කී පරිදි තරුණිය සරසවි ශිෂ්‍යාවකි. නිවාඩු දිනක නිවසට පැමිණි ඇයට පියා කාර්යයක් බාර දී තිබේ. ඒ ගොයමට යෙදීමට පොහොර ටිකක් මිලදී ගෙන එන ලෙසය. පියාගේ ගොවිතැන් කටයුතුවලට උදව් කිරීමට නොපැකිලෙන දියණිය ද පියා දුන් මුදල් ද රැගෙන යතුරු පැදියේ නැගී කෘෂි රසායනික ද්‍රව්‍ය අලෙවි කරන වෙළඳ සලකට ගියාය.


​ෙවළෙඳ සලට ගොස් ආපසු පැමිණීමට යන වේලාව  බොහෝ සෙයින් පමා වූ නිසා පියා දියණියට දුරකථන ඇමතුමක් ගෙන තිබේ. දුරකථනය නාද වුවද දියණිය ප්‍රතිචාර දක්වා නැත. දිගින් දිගටම ඇමතුම් ගත්තද ප්‍රතිඵලය එයම වූ බැවින් කලබලයට පත් පියා දියණිය වෙළෙඳ සලට ගිය මාර්ගය ඔස්සේ සොයා ගොස් ඇත. එහෙත් ඇය ගැන හෝඩුවාවක් නොලැබුණි.


මින් තව තවත් කලබලයට හා පසුතැවිල්ලට පත් පියා අවසානයේ ගල්ගමුව පොලිස් ස්ථානයට ගොස් දියණියගේ අතුරුදන්වීම ගැන පැමිණිල්ලක් කළේය. ආපසු නිවසට පැමිණි මේ පියා නිකමට මෙන් සිය කුඹුරට ගොස් තිබේ.


දියණිය රැගෙන ගිය යතුරු පැදියක් පොහොර උරයක් කුඹුර අසල  පාරේ නතර කොට  තිබුණ ද දියණිය නැත. පියා කුඹුරේ මඳ දුරක් යන විට වගා ළිඳ දෙසින් ශබ්දයක් ඇසී ඇත. එහි ගොස් වගා ළිඳට එබී බලන විට වතුරේ පාවෙමින් දඟලන රිළවකු ඔහුට දකින්නට ලැබී ඇත. තවත් විපරම් කොට බලන විට වගා ළිඳේ ඉවුරේ වූ ගලක එල්ලී සිටින දියණියද දැක ගැනීමට ලැබී තිබේ.


පියා කුඹුරේ සිටිතැයි සිතා පොහොරත් රැගෙන තමා කුඹුරට ගිය බවත් ඒ යන විට වගා ළිඳ දෙසින් ශබ්දයක් ඇසී එහි ගොස් බලනවිට රිළවකු වගා ළිඳට වැටී ගොඩට ඒමට නොහැකිව දඟලන බව දුටු බවත් රිළවා ළිඳෙන් ගොඩ ගැනීමට ලී දඬුවක් ගෙන උත්සාහ කරද්දී තමා ද ළිඳට වැටුණ බවත් ගලක එල්ලී ජීවිතය බේරා ගත් බවත් ඇය පියා ඇතුළු තමන් ගොඩට ගත් පිරිසට පසුව පවසා තිබේ.


පැමිණිල්ල විමර්ශන  කිරීමට පොලිසිය එහි යද්දී අතුරුදන් වූ තරුණිය ළිඳෙන් මතුව ගොඩට විත් සිටි බවත් ඇය පමණක් නොව රිළවෙකුද ඇගේ අතුරුදන්වීමෙන් ජීවිතය ගලවා ගෙන ඇති බවත් පොලිසිය කීය.

(ගල්ගමුව නිහාල් ජයවීර)