ඇමෙරිකන් ජනාධිපතිවරණය එලැඹෙන නොවැම්බර් පස් වැනිදා පැවැත්වීමට නියමිත අතර, ඊට පෙර ජනපද කීපයක වැසියන්ට වේලාසනින් ඡන්දය ලබා දීමට අවස්ථාව හිමිවෙයි. 

මේ වනවිට ෆ්ලොරීඩා ජනපදයේත්, විස්කොන්සින් ජනපදයේත් වැසියන්ට ඡන්දය ප්‍රකාශ කිරීමට අවස්ථාව උදා වී ඇති අතර, බොහෝ දෙනා ඉතා උනන්දුවෙන් ඡන්ද පොළ වෙත යන අයුරු දකින්න ලැබෙන බව ඇමෙරිකන් මාධ්‍ය පවසයි.

වේලාසනින් ඡන්දය ලබා දීම ජනපදයෙන් ජනපදයට වෙනස් වෙයි. ඇමෙරිකාවේ වේලාසනින් ඡන්දය ප්‍රකාශ කිරීම් සිදුවන්නේ ජනතාවගේ පහසුව වෙනුවෙනි.

ඇමෙරිකා ජනාපධිතිවරණය පැවැත්වෙන්නේ, සෑම වසර 4 කටම වරක්, නොවැම්බර් මාසයේ පළමු සඳුදාට පසු යෙදෙන අඟහරුවාදා දිනයේය. මෙවර එම දිනය යෙදී ඇත්තේ නොවැම්බර් පස් වැනි අඟහරුවාදාටය.

ජනාධිපතිවරණ දිනය ඇමෙරිකානුවන් සෑම කෙනකුටම නිවාඩු දිනයක් නොවන බැවින්, ජනපද මටට්මින්, ජනපද වැසියන්ට, ජනපද බලධාරීන්ගේ අභිමතය පරිදි වේලාසනින් ඡන්දය ප්‍රකාශ කිරීමේ අවස්ථාව උදා වෙයි. 

(ඒ.එෆ්.පී.)