ශිෂ්‍ය අරගලය හමුවේ ධුරයෙන් ඉවත් වී ඉන්දියාවට පලා ගිය බංග්ලාදේශ හිටපු අගමැතිනී, ෂෙයික් හසීනා පළමු වරට ප්‍රසිද්ධියේ බංග්ලාදේශ අන්තර්වාර රජයේ නායක මොහොමඩ් යූනුස්ට චෝදනා කළාය. 

ඒ, බංග්ලාදේශ අන්තර්වාර රජය, බංග්ලාදේශයේ හින්දු වැසියන්ට එරෙහිව ගෙන යන ප්‍රචණ්ඩකාරී ක්‍රියා සම්බන්ධයෙනි. හිටපු අගමැතිනිය මෙසේ චෝදනා කළේ, නිව්යෝක් නුවර පැවැති සමුළුවකට ඉන්දියාවේ සිට ඔන්ලයින් ක්‍රමයට වීඩියෝ දසුන් හරහා සම්බන්ධ වෙමිනි.

ශිෂ්‍ය අරගලයෙන් පසු බංග්ලාදේශයේ අන්තර්වාර පාලක මණ්ඩලයක් පිහිටවූ අතර එහි නායකත්වය දරන්නේ යූනුස්ය. අරගලයෙන් පසු බංග්ලාදේශ හින්දු වැසියන්ට මුස්ලිම් වැසියන්ගෙන් කෙණෙහිලිකම් සිදුවෙයි. ඒ, ෂෙයික් හසීනා රජය, දැඩි ඉන්දීය හිතවාදී ප්‍රතිපත්ති අනුගමනය කිරීම නිසාය.

බංග්ලාදේශය මුස්ලිම් රාජ්‍යයකි. හින්දු වැසියන් බංග්ලාදේශයේ සුළුතරයයි. මේ වනවිට ප්‍රචණ්ඩ ක්‍රියා උත්සන්න වී බංග්ලාදේශයේ ප්‍රධාන හින්දු පූජකවරුන් අත්අඩංගුවට ගැනීමට ද මොහොමඩ් යූනුස් ප්‍රමුඛ අන්තර්වාර රජය පියවර ගෙන ඇත. මෙය ඉන්දියාවේත්, ජාත්‍යන්තරයේත් දැඩි විරෝධයට හේතුවක් විය.