බලයෙන් නෙරපා දැමුණු සිරියානු ජනාධිපති බෂාර් අල් අසාද්ගේ බිරිඳ අස්මා, දික්කසාද වීමට කැමැත්ත පළ කර ඇති බවත්, බ්‍රිතාන්‍යය බලා යෑමට කැමැත්ත පළ කර ඇති බවත් විදෙස් මාධ්‍ය වාර්තා කරයි.

අස්මා උපන්නේ 1975 වසරේදීය. ඇයගේ මාපියන් සිරියානු ජාතිකයන් වන අතර, අස්මාට සිරියානු පමණක් නොව, බ්‍රිතාන්‍ය පුරවැසිභාවය ද හිමිවී ඇත.

සිරියානු කැරැල්ල ඔඩුදුවමින්, සිරියානු විපක්ෂයට සහ ඔවුන්ට සහාය දක්වන සටන්කාමීන් එරට බලය අල්ලා ගනිද්දී, අසාද් බිරිඳ අස්මා සහ දරුවන් ආරක්ෂිතව රුසියාවට ගෙන්වා ගෙන ඔවුන්ට රැකවරණ දීමට රුසියානු ජනාධිපති ව්ලැදිමීර් පුටින් කටයුතු කළේය. මේ වනවිට අසාද්, බිරිඳ සහ දරුවන් සිටින්නේ රුසියාවේ මොස්කව් අගනුවරය.

තමන්ට තව දුරටත් රුසියාවේ සිටින නොහැකි බවත්, රුසියාවෙන් පිටවීමට අවශ්‍ය බවත් අස්මා පවසා ඇති අතර, ඇය වැඩි දුරටත් පැහැදිලි කර ඇත්තේ තමන් දික්කසාද වීමට කැමැති බවය. ඊට අදාල නීතිමය ලියවිලි අස්මා රුසියන් නීතීඥවරුන්ට බාර දුන් බව ද පැවැසෙයි. 

මේ සම්බන්ධයෙන් රුසියන් බලධාරීන් පවසා ඇත්තේ අස්මා, අසාද්ගෙන් දික්කසාද වීමක් ගැන කිසිදු තොරතුරක් තමන් නොදන්නා බවත්, එය සාවද්‍ය පුවතක් බවත්ය.

අස්මා, පරිගණක විද්‍යාව සහ ප්‍රංශ සාහාති්‍යය සම්බන්ධයෙන් උපාධිධාරිනියකි බව පැවැසෙයි. බෂාර් අල් අසාද් සමඟ 2000 වසරේ දී විවාහ වීමට පෙර ඇය ආයෝජන බැංකුකාරියක ලෙස කටයුතු කරමින් සිටියාය. අසාද් සහ අස්මා යුවලට දරුවෝ තිදෙනෙක් වෙති.