වඳුරු උණ හෙවත් ‘එම්පොක්ස්’ වයිරසයේ නව ප්‍රභේදය ඉන්දියාවට ව්‍යාප්ත වී ඇතැයි ඉන්දීය සෞඛ්‍ය අංශ පවසයි. 

මෙම නව ප්‍රභේදය ඉතා වේගයෙන් ව්‍යාප්ත වන්නකි. මේ නිසා  ලෝක සෞඛ්‍ය සංවිධානය, වඳුරු උණ හෙවත් ‘එම්පොක්ස්’ වයිරස අවදානම සැලකිල්ලට ගනිමින්, ගොලීය මහජන සෞඛ්‍ය හදිසි තත්ත්වයක් ද නම් කර ඇත. 

වඳුරු උණ හෙවත් ‘එම්පොක්ස්’ වයිරස සේම මෙම නව ප්‍රභේදය ද සොයා ගැණුනේ අප්‍රිකා කලාපයෙනි. මීට පෙර ‘එම්පොක්ස්’ ආසාදිතයන් ඉන්දියාවෙන් වාර්තා වුවත්, මෙම නව ‘එම්පොක්ස්’ වයිරස ප්‍රභේදය සහිත ආසාදිතයකු වාර්තා වූ පළමු අවස්ථාව මෙය යැයි පැවැසෙයි. මෙම ආසාදිතයා, ඩුබායි සිට පැමිණි දකුණු කේරළ ප්‍රාන්තයේ පදිංචි 38 හැවිරිදි අයකු බව ඉන්දීය මාධ්‍ය වාර්තා කර ඇත. 

‘එම්පොක්ස්’ වයිරසය ආසාදනය වූ විට මූලික රෝග ලක්ෂණ ලෙස උණ ඇතිවීම වන අතර සමෙහි ඇතිවන ගැටිති වැනි තුවාල ඉතා වේදනාකාරී වේ. සෑම ආසාදිතයන් සියයකින් සිවු දෙනකු පමණ මරණයට පත්වීමට ඉඩ ඇති බව සඳහන් වේ. ‘එම්පොක්ස්’ වයිරසය සමලිංගිකයන් අතරේ බහුලව ව්‍යාප්ත වන බව ද අනාවරණය වී ඇත.

(එන්.ඩී.ටීවී.)