නයිජර් රාජ්‍යයේ බලය අත්පත්කර ගත් එරට හමුදාව ඇමෙරිකා, ජර්මන් සහ ප්‍රංශ රාජ්‍ය තාන්ත්‍රිකයන්ට එරටින් පිටවීමට පැය 48 ක කාලයක් ලබා දී තිබේ.

නයිජර් බටහිර අප්‍රිකා රාජ්‍යයක් වන අතර, අතීතයේ එය ප්‍රංශ යටත් විජිතයක් විය. අද ඇමෙරිකා සහ ප්‍රංශ හමුදා කඳවුරු ඇත්තේ ද නයිජර් රාජ්‍යයේය. ඒ වෙනුවෙන් ඇමෙරිකා සහ ප්‍රංශ රජය නයිජර් රජයට මුදල් ආධාර ලබා දෙමින් තිබුණි. දැන් ඒ සියල්ල නැවැතී ඇතැයි විදෙස් මාධ්‍ය පෙන්වා දෙයි.

පසුගිය ජුලි මාසයේ නයිජර් රාජ්‍යයේ ජනාධිපති බාසූම් බලයෙන් පහ කළ ජනාධිපති ආරක්ෂක අංශ ප්‍රධානියා පවසා ඇත්තේ, එරට නායකයා ලෙස තමන් කටයුතු කරන බවය. නයිජර් ජනාධිපති ආරක්ෂක අංශය පවතින්නේ හමුදාව යටතේය.

නයිජර් හමුදා පාලනය තමන් පිළිනොගන්නා බවත්, බාසූම් යළි ජනපති කළ යුතු බවත් ඇමෙරිකාව, ප්‍රංශය සහ යුරෝපා සංගමය දිගින් දිගටම අවධාරණය කර ඇත.