රුසියානු - යුක්රේන යුද්ධය ආරම්භ වී වසරක කාලය ඇතුළත අවම වශයෙන් යුක්රේන ළමුන් 6000 ක පමණ පිරිසක් රුසියාවේ සහ ක්‍රිමියාවේ කඳවුරු 43 ක රඳවා තබා ගනිමින් එම ළමුන් රුසියාවේ මතයට නැඹුරු කර ගැනීම සඳහා දේශපාලනික සහ හමුදාමය අධ්‍යාපනය ලබා දී ඇතැයි ඇමෙරිකානු එක්සත් ජනපදය නිකුත් කළ වර්තාවක දැක්වේ.

රඳවා ගත් ඇතැම් ළමුන්ට අවි පුහුණුව ලබා දී ඇතැයි වාර්තාවේ සඳහන් වූවත් ඒ පිළිබඳ සාක්ෂි නොමැති බව විශ්ලේෂකයෝ පවසති.පිටු 35 කින් යුත් මෙම වාර්තාව පෙන්වා දී ඇත්තේ යුක්රේන ළමුන් ඔවුන්ගේ කැමැත්තකින් තොරව රුසියානු පාලනය යටතේ තිබෙන කඳවුරු වල රඳවා ගෙන සිටින බවත් එය යුධ අපරාධයක් බවත්ය.එම කඳවුරු වල වයස මාස 4 ක ළදරුවන්ද සිටින බව එම වාර්තාවේ දැක්වෙයි.

එම කඳවුරු සිටින දරුවන් ඔවුන්ගේ කැමැත්තකින් තොරව දරුකමට හදා වඩා ගැනීම සඳහා ලබා දී ඇතැයිද  එම වාර්තාවේ සඳහන් කර තිබේ. මෙසේ යුක්රේන ළමුන් පැහැර ගනිමින් ඔවුන් යුක්රේනයට යෑම වළකා රුසියාවේ මතයට හරවා ගැනීම සහ ඔවුන් අවසරයකින් තොරව දරුකමට හදා වඩා ගැනීමට ලබා දීම යුද අපරාධයක් බව එම වාර්තාව වැඩි දුරටත් පෙන්වා දී ඇත.

(රොයිටර්)