2021 ඔක්තෝබර් මස 18 වන සඳුදා
ඇමෙරිකානු ජනපතිවරණයේදී රුසියාව ඩිමොක්‍රටික් පක්ෂයේ පරිගණක පද්ධතියට අනවසරයෙන් ඇතුළු වූ බවට ඇමරිකාවේ ජනාධිපතිවරයා ලෙස තේරී පත්වු ඩොනල්ඩ් ට්‍රම්ප් මහතා විශ්වාස කරන බව ට්‍රම්ප් මහතාගේ කාර්ය මණ්ඩල ප්‍රධානී රෙයින්ස් ප්‍රීබස් පැවසීය.
ඇමෙරිකා බුද්ධි අංශ මේ සම්බන්ධයෙන් ලබා දුන් වාර්තාව නව ජනාධිපතිවරයා පිළිගන්නා බවත් ඊට එරෙහිව නීතීමය ක්‍රියාමාර්ග ගන්නා බවත් ප්‍රීබස් මහතා කීවේය.
මෙම සිදුවීම රුසියානු ජනපති ව්ලැඩිමීර් පූටින් මහතාගේ අනුදැනුම ඇතිව සිදුවූවාද යන්න ඇමරිකාවේ නව ජනාධිපතිවරයා එකඟ වූ බවක් ඔහු පැහැදිලිව පැවසුවේ නැත..
ඩිමොක්‍රටික් පක්ෂයේ ඊමේල් අනවසරයෙන් ලබාගත් බවට රුසියාවට එල්ල වූ චෝදනා ට්‍රම්ප් මහතාගේ කණ්ඩායම විසින් පිළිගන්නා ලද ප්‍රථම අවස්ථාව මෙයයි. මීට පෙර අවස්ථා කිහිපයකදීම රුසියාවට එල්ල වූ චෝදනා ට්‍රම්ප් මහතා විසින් ප්‍රතික්ෂේප කරන ලදි. ට්‍රම්ප් මහතා පැවසුයේ එම සිදුවීම පිටුපස චීනය හෝ වෙනත් රටක් සිටි බවකි.
ට්‍රම්ප් මහතාගේ දිවුරුම් දීමේ උළෙලට සති දෙකක් තිබියදී මෙම චෝදනා පිළිගැනිමට හේතුවූයේ ට්‍රම්ප් මහතාට පාක්ෂිකයන්ගෙන් එල්ල වූ බලපෑම නිසා බව දේශපාලන විශ්ලේෂකයෝ පවසති.
ජනපතිවරණයේදී ඩිමොක්‍රටික් අපේක්ෂිකා හිලරි ක්ලින්ටන් මහත්මිය අවමානයට පත් කිරීම සඳහා කළ සයිබර් ප්‍රහාරයට රුසියානු ජනපතිවරයා සම්බන්ධ වීයැයි ඇමෙරිකා බුද්ධි අංශ පසුගිය සතියේ වාර්තාවක් නිකුත් කළේ ය.
