දකුණු සිරියාවේ ඊශ‍්‍රායලයට මායිම් වූ ගෝලාන් කඳුකරය අසල  පිහිටි සිරියානු හමුදා බුද්ධි අංශ මූලස්ථානයක් අත්පත් කර ගැනීමට කැරැලිකරුවෝ ඊයේ (18) සමත් වූහ.
සිරියානු රජය එම බුද්ධි අංශ මූලස්ථානය පිහිටුවා ඇත්තේ 1974 වසරේ දී ඇමෙරිකාව මැදිහත් වී ඊශ‍්‍රායලයත් සිරියාවත් සටන් විරාමයක් ආරම්භ කළ අවස්ථාවේදීය.
හමුදා බුද්ධි අංශ මූලස්ථානය අත්පත් කර ගැනීමට කැරැුලිකරුවන් සියයකට වැඩි පිරිසක් පැමිණි බවත් ඔවුන් සහ හමුදා නිලධාරීන් අතර පැය පහකට ආසන්න කාලයක් ගැටුම් පැවැති බව ද වාර්තා විය.
මේ අතර යුරෝපා සංගමයේ සෙසු සාමාජික රටවල් විරුද්ධ වුණත්, සිරියාවට එරෙහිව පනවා තිබූ ආයුධ තහනම සැළකිල්ලට නොගෙන තමන් සිරියානු කැරැලිකරුවන්ට ආයුධ දීමට සූදානම් බව බි‍්‍රතාන්‍ය අගමැති ඬේවිඞ් කැමරන් සහ ප‍්‍රංශ ජනපති ෆ‍්‍රන්සුවා  ඕලන්ද් පවසා ඇත.
සිරියාවට එරෙහිව පනවා තිබූ ආයුධ තහනම ඉවත් කිරීම සම්බන්ධයෙන් යුරෝපා සංගමයේ සෙසු සාමාජික රටවල් සමඟ බි‍්‍රතාන්‍ය සහ ප‍්‍රංශය සාකච්ඡුා කළ නමුත් සෙසු රටවල් කියා සිටියේ එම තහනම දිගටම පැවැතිය යුතු බවය.