ඡන්ද හිමි නාමලේඛන සංශෝධනයට එරෙහිව, දිල්ලියේ මැතිවරණ කොමිසම් කාර්යාලයට විරෝධතා පා ගමනක් යමින් සිටි ඉන්දීය විපක්ෂ නායක රාහුල් ගාන්ධි, සොහොයුරිය ප්‍රියංකා ගාන්ධි සහ විපක්ෂ ක්‍රියාකාරීන් සහ විපක්ෂ මන්ත්‍රීහු 30 කට වැඩි පිරිසක් පොලිස් අත්අඩංගුවට පත් වූහ.

මෙම විරෝධතා පා ගමන මෙහෙයවූයේ රාහුල් සහ ප්‍රියංකා නියෝජනය කරන ඉන්දියාවේ ප්‍රධාන විපක්ෂ දේශපාලන කණ්ඩායම වන කොංග්‍රස් පක්ෂයයි. කොංග්‍රස් පක්ෂයට සහාය දක්වන සෙසු විපක්ෂ දේශපාලන කණ්ඩායම්වල සාමාජිකයෝ ද විරෝධතා පා ගමනට එක් වූහ.

රාහුල් ගාන්ධි සහ කොංග්‍රස් පක්ෂය, අග්‍රාමාත්‍ය නරේන්ද්‍ර මෝදිගේ රජයට චෝදනා කරන්නේ, තමන් පරාජය වූ ප්‍රාන්තවල ඡන්දදායකයන්ගේ නම්  මැතිවරණ ලැයිස්තුවලින් ඉවත් කිරිමට පියවර ගෙන ඇති බවටය.

විරෝධතා පා ගමනට 300 කට වැඩි පිරිසක් සහභාගී වූ අතර, පොලිසිය ඔවුන්ට හරස් විය. අත්අඩංගුවට ගැනීමෙන් පසු එම පිරිස බස් රථවලින් රැගෙන ගිය බවත් ඉන්දීය මාධ්‍ය වාර්තා කළේය.

‘මෙය දේශපාලනික සටනක් නොව, ආණ්ඩුක්‍රම ව්‍යවස්ථාව රැකගැනීමේ සටනක් බවත්,  අගමැති නරේන්ද්‍ර මෝදිගේ භාරතීය ජනතා පක්ෂය ඔවුන්ට වාසිදායක වන අයුරින්, ඡන්ද හිමි නාමලේඛන සංශෝධනය කරනවා’ යැයි රාහුල් ගාන්ධි මාධ්‍ය හමුවේ පවසා ඇත.

බිහාර් ප්‍රාන්ත මැතිවරණය මෙම වසර අවසානයේ පැවැත්වෙයි. එම මැතිවරණයට සූදානම් වෙද්දී, මේ අයුරින් මැතිවරණ ලැයිස්තු සංශෝධනය කිරීම කිසිසේත් ප්‍රජාතන්ත්‍රවාදී නොවන බව රාහුල් ගාන්ධි වැඩි දුරටත් පවසා ඇත.