දකුණු යුරෝපා රටවල උෂ්ණත්වය මේවනවිට  සෙල්සියස් අංශක 40 ඉක්මවා ගොස් ඇති බවත්, දකුණු යුරෝපා රටවල් රැසක ළැව්ගිනි ව්‍යාප්ත වෙමින් පනතින බවත් වාර්තා වේ.

ළැව් ගිනිවලට හසුවීමෙන්, තිදෙනකු මියගොස් ඇති බවත්, දහස් ගණනකට උන්හිටිතැන් අහිමි වී ඇති බවත් වාර්තා වේ. නිවාස දහස් ගණනක් ළැව්ගිනි හේතුවෙන් විනාශ වී ඇතැයි ද පැවැසෙයි.

ළැව් ගිනි ව්‍යාප්ත වන බව පැවසෙන්නේ, ඉතාලිය, ප්‍රංශය, ස්පාඤ්ඤය, පෘතුගාලය සහ ග්‍රීසිය යන රටවලය. මෙම රටවල උෂ්ණත්වය සෙල්සියස් අංශක 40 ඉක්මවා යෑම හේතුවෙන්, අධික උෂ්ණත්වය දරා ගැනීමට නොහැකිව කුඩා දරුවන් සහ වැඩිහිටියන් රෝහල්ගත කර ඇතැයි ද පැවැසෙයි.

මේ අතර ස්පාඤ්ඤ කාලගුණ සේවය නිකුත් කළ නිවේදනයක දැක්වෙන්නේ, එරට සෙවිල් සහ කෝර්ඩෝබා හි උෂ්ණත්වය සෙල්සියස් අංශක 44 ඉක්මවීමේ අවදානමක් පවතින බවය.

ස්පාඤ්ඤ අගමැති පේද්‍රෝ සැන්චෙස් පැවැසුවේ එරට පැතිරයන ළැව්ගිනි පාලනය සඳහා ගිනි නිවීමේ සේවා වෙහෙස නොබලා කටයුතු කරන බවය. ළැව්ගිනි මර්දනයට සොල්දාදුවන් 1,000 ක් පමණ යොදවා ඇති ද පැවැසෙයි.