පාකිස්තානයේ සිටින නිව්යෝර්ක් ටයිම්ස් පුවත්පතේ කාර්යාංශ ප‍්‍රධානියා එරටින් නෙරපීමට පියවර ගෙන ඇති බව වාර්තා වේ. 
අනුමත කළ නොහැකි හා අසාධාරණ පුවත් වාර්තාකරණය නිසා මෙලෙස නිව්යෝර්ක් ටයිම්ස් පුවත්පතේ කාර්යාංශ ප‍්‍රධානියා වන ඩික්ලෑන් වොල්ෂ් රටින් පිටුවහල් කිරීමට පියවර ගත් බව පාකිස්තාන රජය කියයි.
බි‍්‍රතාන්‍ය ජාතික මාධ්‍යවේදියකු වන තිස්නම හැවිරිදි වොල්ෂ් නිව්යෝර්ක් ටයිම්ස් පුවත්පතට සම්බන්ධ වූයේ ඉකුත් වසරේදීය. ඒ වන තෙක් ඔහු ‘ද ගාඩියන්’ පුවත්පතේ සේවය කළේය. 
වොල්ෂ්ට පැය 72ක් ඇතුළත රටින් පිටවන ලෙසත් ඔහුගේ වීසා අවලංගු කර ඇති බවත් එම නියෝගයේ සඳහන්ය. 
පාකිස්තානයේ දේශපාලන ගැටුම්, අන්තවාදීන්ගේ කි‍්‍රයා හා ඇමෙරිකාව සමඟ තිබූ මතභේදාත්මක තත්ත්වයන් ගැන ඔහු නිරන්තරයෙන් නිව්යෝර්ක් ටයිම්ස් පුවත්පතට ලිපි සැපයූ මාධ්‍යවේදියෙකි.