ඉන්දික හේවාවිතාරණ

මැතිවරණවලදී භාවිත කරන ඡන්දවලින් වැඩි ප්‍රමාණයක් අවලංගු වී තිබෙන්නේ පාර්ලිමේන්තු මැතිවරණවලදී බැවින් මෙම මැතිවරණයේදී ජනතාව මේ පිළිබඳව අවධානය යොමු කළ යුතු බව පැෆ්රල් සංවිධානය සඳහන් කරයි.

2020 වසරේ පැවැති පාර්ලිමේන්තු මැතිවරණයේදී ඡන්ද හත්ලක්ෂ හතළිස් හතර දහස් තුන්සිය හැත්තෑ තුනක් අවලංගු වී තිබෙන බවත් එය ප්‍රතිශතයක් ලෙස 4.58ක් බවත් එම සංවිධානයේ විධායක අධ්‍යක්ෂ රෝහණ හෙට්ටිආරච්චි මහතා සඳහන් කළේය.

2015 වසරේ පැවැති මැතිවරණයේදී  ඡන්ද පන්ලක්ෂ දාහත් දහස්  එකසිය විසිතුනක් ප්‍රතික්ෂේප වී තිබේ. එය ප්‍රතිශතයක් ලෙස 4.43කි.

2010 වසරේ පැවති මැතිවරණයේදී  සියයට 6.92කි. 2004 වසරේ පැවැති මැතිවරණයේදී සියයට 5.46කි. 2001 වසරේ පැවැති මැතිවරණයේදී සියයට 5. 22කි. 2000 වසරේ මැතිවරණයේදී සියයට 5.27කි. 1994 වසරේ මැතිවරණයේදී 4.80කි. 1989 වසරේ මැතිවරණයේදී  සියයට 6.13කි. 

මේ නිසා මෙවර පාර්ලිමේන්තු මැතිවරණයේදී ඡන්ද පත්‍රිකාව නිවැරදි ලෙස නිරීක්ෂණය කර තමන් කැමැති පක්ෂයට ඡන්දය ලබා දී ඉන් පසුව මනාප ලබා දෙන ලෙසට ජනතාවගෙන් ඉල්ලා සිටින බවද රෝහණ හෙට්ටිආරච්චි සඳහන් කළේය. 

සෑම ඡන්ද දායකයෙකුටම එක් ඡන්දයක් තිබෙන බවත් ඡන්දය පිළිගත් දේශපාලන පක්ෂයකට හෝ ස්වාධීන කණ්‍ඩායමකට දෙනු ලැබිය හැකි බවත් ඔහු පෙන්වා දෙයි.

පිළිගත් දේශපාලන පක්ෂය, නම සහ ලකුණු ඉදිරියේ හෝ ස්වාධීන කණ්‍ඩායමේ අංකය සහ ලකුණු ඉදිරියේ ඇති හිස් කොටුවේ කතිර ලකුණ (x) යෙදීමෙන් ඡන්දය ලබා දිය යුතු බවද හෙතෙම පවසයි.

ඊට පසු දේශපාලන පක්ෂයේ හෝ ස්වාධීන කණ්‍ඩායමේ අපේක්ෂකයන්  තුන්දෙනෙකුට නොවැඩි අපේක්ෂකයන් ගණනකට ස්වකීය මනාපය පළ කළ හැකිය. ඡන්ද පත්‍රිකාවේ අග අපේක්ෂකයාට අදාළ මනාපය සලකුණු කිරීම සඳහා අනුක්‍රමික අංක තිබේ. අනුරූපීය අංකය ඇතුළත් කොටුව මත කතිරය (x) සලකුණක් යෙදීමෙන් මනාපය ලබා දීම සිදු කළ හැකිය.

දේශපාලන පක්ෂ එකකට වැඩි ගණනකට ඡන්දය ප්‍රකාශ කළහොත් හෝ ස්වාධීන කණ්ඩායම් එකකට වැඩි ගණනකට ඡන්දය ලබා දීමට කටයුතු කළහොත් හෝ තමා පසුව හඳුනා ගැනීමට හේතු විය හැකි යම් ලකුණක් පත්‍රිකාවේ තැබුවහොත් ඡන්ද පත්‍රිකාව බලරහිත වන බවත්, එය ගණනය නොකරන බවද මැතිවරණ කොමිෂන් සභාව සඳහන් කරයි.

ඡන්දය හා මනාපය ලබා දීම සඳහා කතිරය (x) පමණක් භාවිත කරන ලෙසත් කොමිසම ඉල්ලා සිටියි.