ජර්මනියේ විදේශ ඇමැති ෆරෑන්ක් වෝල්ටර් ස්ටීන්මෙයර්ගේ ශ්රීලංකා සංචාරයට එක්ව සිටි සාමාජිකයෙක් විදේශ අමාත්යංශයේ විද්යුත් මාධ්යවේදීන් දෙදෙනෙකු අතර හුවමාරුවූ උණුසුම් වචන මැද්දට පැන දෙදෙනා සාමදාන කළේය.
ඔවුන් ළඟට ආ ජර්මන් ජාතිකයා එම දෙදෙනාටම හොඳ සිංහලෙන් කතාකළේය.
‘කලබල වෙන්න ඕන නැහැ.නිශ්ශබ්ද වන්න‘
යනුවෙන් ඔහු කියද්දී මරාගන්නට ගිය අර දෙදෙනා සන්සුන් වූහ.
මීට අවුරුද්දකට පමණ කලින්ද මෙවැනි සිද්දියක් එම ගොනැගිල්ලේදීම සිදුවිය.එදා සිංහලෙන් කතාකළේ චීන තානාපති නිලධරයෙකි.
එම චීන ජාතිකයා සමග පැමිණ සිටි ශ්රීලංකා ජාතික සමාගම් අධ්යක්ෂකවරයෙක් ඔවුන් දෙදෙනාට තේ කෝප්ප දෙකක් ගෙන එන ලෙස කාර්යාල සහායකයෙකුට කීවේය.
‘මෙයාට දියවැඩියාව තියෙනවාද දන්නේ නැහැ.සීනි වෙනම ගේන්න‘
යනුවෙන් අධ්යක්ෂකවරයා ගෝලයාට කීවේය.
නිල සාකච්ඡාව අවසානයේදී චීන ජාතිකයා සමුගනිද්දී අධ්යක්ෂකට හොඳ පාඩමක් ඉගැන්වූයේය.ඒ හොඳ සිංහලෙන් කතාකරමිනි.
‘මහත්මයා මට දියවැඩියාව නම් නැහැ.‘
එම අධ්යක්ෂකවරයා නොදැන සිටි කාරණය වූයේ ඒ චීන නිලධරයා තානාපති නිලධරයෙකු වීමට පෙර ශ්රීලංකා සරසවියකින් සිංහල ඉගෙනගත් අයෙකු බවය.
විදේශිකයින් සිංහල නොදන්නා බව සිතූ තවත් වෙළෙන්දෙක් හොඳටම අමාරුවේ වැටුණේය.ඒ ලිබර්ටි ප්ලාසා සංකීර්ණයේදීය.
ජපන් ජාතික තානාපති නිලධරයින් පිරිසක් ඔහුගේ සාප්පුවට ඇතුල් වෙද්දී අයිතකරු ගෝලයන්ට කෑගසා කීවේ
‘ගාණ වැඩිකරලා කියනවා‘ යනුවෙනි.
ජපාන තානාපති නිලධරයා සිංහලෙන් කතාකළේය.
‘ගාණ වැඩිකරලා කිව්වොත් මම මේ කඩෙන් බඩු ගන්නේ නැහැ.‘
ජපන් ජාතිකයාගේ ඒ කතාවෙන් සාප්පුව හිමිකරුට පොළව පලාගෙන යන්නට හිතෙන්නට ඇති.ඒත් ඔහු සිදුවූ වරදට සමාව ඉල්ලා සිටියේය.
