(කරන්දෙණිය - එම්. සුසිල් ප්‍රියන්ත)
සේවා ස්ථානයේ පැවති උත්සවයේ වියදම් පියවීමේ බිල්පත්වල පෙර දින රාත්‍රියේ මිතුරන් සමග මත්පැන් පානය සඳහා ගත් කටගැස්මේ බිල ද වැරැදීමකින් අමුණා එය මාට්ටු වී දුෂ්කර පළාතකට මාරුවීම් ලැබූ සේවකයකු පිළිබඳව දකුණේ නගරයකින් අසන්නට ලැබේ.
සුවච කීකරු සේවකයෙකි. ඔහුගේ වැඩ ද පිළිවෙළය. ගනුදෙනු ද විනිවිදභාවයෙන් යුක්තය. මේ නිසාම සිය සේවා ස්ථානයේ උත්සව සඳහා වියහියදම් කිරීමට ආයතන ප්‍රධානියා විසින් නිතරගයෙන්ම පවරන්නේ ඔහුටය.
එදා පැවති උත්සවයේ වියදම් දැරුවේ ද ඔහුය. සියලුම වියදම් කෙරුණේ බිල්පත් ලබාගෙන. ඒ සියල්ලම ඔහුගේ මුදල් පසුම්බියේය. එදා උත්සවය සාර්ථකව නිම වූ නිසාම මිතුරන් සමග ඔහු එදා රාත්‍රියේ සෙට් වූයේය. එයට අවශ්‍ය බයිට් ගැනීමට මුදල් දුන්නේ ඔහුටය. ගත් බයිට්වලට ද ඔහු බිල්පතක් ලබාගත්තේය. ඒ මිතුරන්ට වුව ද තමාගේ විනිවිදභාවය පෙන්වීමටය. ඒ බිල ද ඔහුගේ මුදල් පසුම්බියේය.
පසු දින කාර්යාලයට ගිය ඔහුගේ පළමු කාර්යය වූයේ උත්සවයේ වියදම් සඳහා ගත් මුදල් පියවීමය. ඇස් පෙනීම මෙන්ම මතක ශක්තිය ද යම් ඌන මට්ටමක තිබූ ඔහු මුදල් පසුම්බියේ තිබූ සියලුම බිල්පත් වියදම් පියවීම සඳහා ඇමුණුවේය.
වියදම් විස්තරය ආයතන ප්‍රධානියා කිසිදු පරීක්ෂා කිරීමකින් තොරව අනුමත කර ප්‍රධාන කාර්යාලයට යැව්වේ ඔහු ගැන තිබූ විශ්වාසයෙනි. ගත වූයේ ටික දිනකි. ඔහුට සිය ප්‍රදේශයෙන් බැහැර දුෂ්කර ප්‍රදේශයකට මාරුවක් ලැබුණේය.
එම ස්ථාන මාරුවට හේතුව ලෙස පෙන්වා දී තිබුණේ උත්සවයක වියදම් පියවීම සඳහා එම උත්සවයට කිසිසේත්ම අදාළ නැති බයිට් බිලක් ඊට අමුණා තිබීමය. බයිට් බිලේ මුදල් ද ඔහුට ගෙවීමට නියම කර තිබුණි.
