කරාපිටිය – ජී.ඩබ්ලිව්.කේ. ප්‍රේමතිලක ද සිල්වා
හෙතෙම දකුණේ අගනුවරට නුදුරින් වාසය කරන පුද්ගලයකි. ගමන මෝටර් රථයෙනි. පෞද්ගලික සමාගමක ඉහළ තනතුරක් දරයි. කෙසේ වෙතත් හෙතෙම හොඳ බොනපාට් කෙනෙකි.
දිනක් තම පාසල් මිතුරකුගේ දියණියගේ විවාහ මංගල්‍යයට ආරාධනා කිරීම සඳහා පැරැණි මිතුරා නිවෙසට පැමිණියේය. මෙහිදී මෙම පවුල් දෙක අතර තිබෙන සම්බන්ධය උඩ තම මිතුරා විසින් තම භාර්යාවට ද ආරාධනා කිරීම ගැන සතුටට පත් මෙම කතානායකයා, ආගිය තොරතුරු විමසා මිතුරා හට සංග්‍රහයක් ද කර ඔහු ඇරලවන්නට ද පියවර ගත්තේය.
මෙම විවාහයට පෙර සූදානමක් ලෙස ආරාධනයෙන් දින කිහිපයකට පසු තම බිරිය කැටුව ගොස් මඟු‍ලට සරිලන ඇඳුම් පැලඳුම් ද මිලයට ගැනීමට හෙතෙම කටයුතු කළේ ජැන්ඩියට හැඳ පැලඳ තම මිතුරාගේ දියණියගේ විවාහයට යා යුතු බව සිතමිනි.
මංගල දිනයට තව ඇත්තේ දින දෙකකි. කෙසේ වෙතත්, මෙම පුද්ගලයාගේ බිරිය මේ වන විට අසනීප වූවාය. මේ ගැන අසතුටෙන් පසු වූ හෙතෙම තනියෙන්ම මෙම මංගල උළෙල සඳහා යාමට පිටත් වූයේ බිරිය අසනීප වීම හේතුවෙනි.
මංගල උත්සවය පැවැත්වෙන හෝටලයට කලින්ම පාහේ මෙම කතානායකයා ළඟා වී තිබූ අතර, තම මිතුරා ඔහු සාදරයෙන් පිළිගත්තේය. දැන් චාරිත්‍ර අවසන් වීමෙන් පසුව තම මිතුරා මෙකී පුද්ගලයාට දිවා භෝජනයට පෙර මධුවිත සප්පායම් වීම සඳහා ආරාධනා කළේය. පසුව පාසල් මිතුරන් තවත් කිහිප දෙනකුටම මෙම මංගල උත්සවයට ආරාධනා ලැබ තිබීම හේතුවෙන් ඔවුන් සමඟ හෝටලයේ මධුවිත සප්පායම් වීම සඳහා සූදානම් කර තිබූ ස්ථානයට ගොස් ඒ සඳහා සූදානම් විය.
දැන් පැය එක හමාරක් දෙකක් ගත විය. සියලු දෙනාටම දැන් බඹර පදම්ය. දිවා භෝජනය සඳහා මොවුන්ට ඇරැයුම් ලැබිණි. මේ වන විට අනෙක් බොහෝ දෙනෙක් තම දිවා ආහාරය ගෙන පසුව සංගීත රසය විඳමින් සිටියෝය.
පදමට සූර් වී සිටි අපේ කතානායකයා දිවා ආහාරය ගැනීමෙන් පසුව සංගීත රසාස්වාදය ද ලබාගෙන නිවෙසට යාම සඳහා සමුගැනීමේ අරමුණින් මනාල යුවළ වෙත පියනැග්ගේ තම මුදල් ත්‍යාගය ලබා දෙනු පිණිසය. පසුව එම ත්‍යාගය මනාල යුවළට ලබා දී ඔවුන්ගෙන් සමුගෙන නිවෙස බලා පිටත් වූයේ බඹර පදමට සූර් වී සිටි අතරතුරදීය.
කෙසේ හෝ මෙම පුද්ගලයා නිවෙසට පැමිණියේය. පසුව තම පුත්‍රයා මෙම කතානායකයා වෙත පැමිණ පසු දින ටියුෂන් පන්තියට ලබා දීම සඳහා මුදල් ඉල්ලා සිටියේය. එවිට මෙම පුද්ගලයා තම පුතුට මුදල් ලබා දීම සඳහා කලින් දින ලබාගත් පඩි පැකට්ටුව අතට ගැනීමට සිතා එය පිරික්සා බැලීය. එවිට මෙම පුද්ගලයාට කරුණු වැටහී ගියේ ඒ වන විට වෙරි හිඳී ගොස් තිබුණු හෙයිනි.
මේ අවස්ථාවේදී ඔහුට සිහි වූයේ වෙරි මරගාතේ සිටි තමා, තම මිතුරාගේ දියණියට ත්‍යාගය ලෙස ලබා දී තිබුණේ තම වැටුපම දමා තිබූ මුදල් කවරය බවයි. මේ බව දැනගත් හෙතෙමට දෙවියන් සිහි විය. කෙසේ වෙතත්, දැන් කරන්නට කිසිවක් නොමැති බව තේරුම්ගත් මෙම කතානායකයාට පුතුගේ ටියුෂන් පන්තියට අවශ්‍ය මුදල් ලබා දීම සඳහා නගරයේ ඒටීඑම් යන්ත්‍රය වෙත ගියේ මේ බව තම බිරිය දැනගතහොත් ලු‍ණු ඇඹුල් ඇතිව තමන්ට අහගන්නට වන බව සිතමිනි.
