(තිහගොඩ උපසේන ලියනගම)
දකුණු පළාතේ උපනගරයක පිහිටි පොලිස් ස්ථානයකට උදෑසනම පැමිණිල්ලක් දැමීමට ආවේ ගමේ කුඩා වෙළෙඳසලක් පවත්වාගෙන ගිය මුදලාලි කෙනෙකි.
පෙර දින රාත්රියේ තම වෙළෙඳසලේ පසුපස දොර ගලවා සොරකු ඇතුළු වී ඇති බවත් තමා කුරුඳු විකිණීමෙන් ලබාගත් රුපියල් ලක්ෂ දෙකක මුදල ගැනීමට මේ සොරා ඇතුළු වී ඇති බවත් ඔහු පැමිණිල්ල දැමීය.
ඒ සල්ලි ඔක්කොම ගෙනිහිල්ලා දැයි පැමිණිල්ල ලියූ පොලිස් නිලධාරියා විමසීය.
නෑ රාලහාමි, මම මොනවත් බැලුවෙ නෑ. ඇඟිලි සලකුණු ගන්න ඕනෑ නිසා පොලිසියත් එක්ක ගිහින් බලනවා. ඔහු කීය.
පොලිස් නිලධාරීන් දෙදෙනකු සමඟ එහි ගොස් වෙළෙඳසල පරික්ෂා කළ විට කිසිම දෙයක් සොරාගෙන ගොස් නැති බවත් මුදල්ද එලෙස තිබූ බවත් අනාවරණය වූ අතර ඉදිරිපස කඩ බක්කි පරීක්ෂා කළ මුදලාලි මවිතයට පත්වූයේ එහි වූ පොල්ගෙඩි විස්සක් පමණ හොරා ගෙන ගොස් ඇති බව දුටු හෙයිනි.
මේ බව පොලිස් නිලධාරීන්ට කී විට ‘‘ඒක හරි පොල් ගෙඩිටික මසුරන් වටිනවානේ” කියා පොලිස් නිලධාරීන් කඩෙන් එළියට බැස්සාලු.
