(මොහොමඩ් ආසික්)

හෙරොයින්,මුදල්,රන්භාණ්ඩ උකස් කළ  රිසිට්පත්, බැංකු කාඩ්පත් ඇතුළු දේපොළ රැසක් සමඟ අඹුසැමි යුවළක් අද (28) අත්අඩංගුවට ගත් බව කටුගස්තොට පොලිසිය පවසයි.

කටුගස්තොට පොලිසියේ  බුද්ධි අංශයට ලැබුණු තොරතුරක් අනුව  විමර්ශණයක් සිදුකර මෙම අඹුසැමි යුවළ පොලිසිය විසින් අත්අඩංගුවට ගනු ලැබීය.

සැකකරුවන් අත්අඩංගුවට ගෙන පරීක්ෂා කිරීමේදී සැමියා ළඟ තිබී හෙරොයින් මිලිග්‍රෑම් 875 ක් ද බිරිඳ ළඟ තිබී රුපියල් 1,59,000 ක්, විවිධ මුල්‍යායතනවලට රන් භාණ්ඩ උකස් කරනු ලැබූ රිසිට්පත් නවයක්  සමඟ වෙනත් කාන්තාවකට අයත් බැංකු ඒ ටී.එම්. කාඩ් පතක් ද පොලිසිය බාරයට ගෙන තිබේ.

අත්අඩංගුවට ගත් අඹුසැමි යුවළට එරෙහිව මත්ද්‍රව්‍ය ළඟ තබා ගැනීමේ චෝදනාව යටතේ කටයුතු කරන අතර  මුදල් විශුද්ධිකරණය යටතේ ද විමර්ශණ සිදු කිරිමට නියමිතව ඇති බව පොලිසිය කියයි.