(එස්. ඩී.කොඩිකාර)

සයිප්‍රස් රටේ රැකියා ලබාදෙන බව පවසා පුද්ගලයන්ගෙන්  රුපියල් ලක්ෂ පහළොවකට අධික මුදලක්   වංචා සහගත ලෙස  ලබා ගත් පුද්ගලයකු  අද (19)  දෙනියාය නගරයේ දී අත්අඩංගුවට ගත් බව දෙනියාය  පොලිසිය  කියයි.

අත්අඩංගුවට ගත් සැකකරු (45) හැවිරිදි රාහුල පාර, මාතර ප්‍රදේශයේ පදිංචි පුද්ගලයෙකි.

සැකකරු දෙනියාය, පල්ලෙගම, කොළවෙනිගම, බටාඳුර, ලංකගම, වතුරාව, විහාරහේන  යන ආදී ප්‍රදේශවලට ගොස්  කාන්තාවන් සහ පුද්ගලයන් සමඟ  කුළුපඟ වී   රවටා ඔවුන්ට සයිප්‍රස් රටේ  රැකියා ලබාදෙන බව පවසා එක් අයකුගෙන් රුපියල් 80,000බැගින් අත්තිකාරම් මුදල්  ලබාගෙන ඇති බවට  පැමිණිලි ලැබී ඇති බව පොලිසිය කියයි.

සැකකරු යතුරුපැදියකින් මාතර ප්‍රදේශයට ගමන් කරමින් සිටියදී පොලිස් නිලධාරීන් කණ්ඩායමක් අත්අඩංගුවට ගෙන ඇත.

සැකකරු මෙවැනි අයුරින්  වංචා සහගත ලෙස ඉකුත් දෙසැම්බර් මාසයේ සිට මුදල්  එකතු කර ඇති බවත් ඔවුන්ට සයිප්‍රස් රටේ  රැකියා ලබා දීම  ලබන මාර්තු මස තුළදී  කරන බවට සැකකරු පොරොන්දු වී ඇති බව වංචාවට හසු වූ අය පවසති.

අත්අඩංගුවට ගත් සැකකරු අද (19) මොරවක මහේස්ත්‍රාත් අධිකරණයට ඉදිරිපත් කිරීමට නියමිතය.

සිද්ධිය සම්බන්ධයෙන් දෙනියාය පොලිසිය පරීක්ෂණ පවත්වයි.