(ආනන්ද ඉ ජයකොඩි)

ඩ්‍රෝන කැමරාවක් උපයෝගී කරගනිමින් අද (18) නිට්ටඹුව ප්‍රදේශයේ කරන ලද හදිසි  සෝදිසි මෙහෙයුමකදී සංචරණ සීමා නීතිය උල්ලංඝනය කරන ලද පුද්ගලයින් 19 දෙනෙකු අත් අඩංගුවට ගත් බව පොලිසිය කියයි.

නිට්ටඹුව නගරයෙන් ඩ්‍රෝන කැමරාවක් ගුවන් ගත කිරීමෙන් පසුව ඒ මගින් දෙන ලද වීඩියෝ වාර්තා ඔස්සේ පොලිස් යතුරු  පැදි කණ්ඩායමක් සංචරණ නීති කඩ කරන්නන් සොයා ගොස් අත් අඩංගුවට ගැනීම සිදු කරනු ලැබීය.

එසේ අත් අඩංගුවට ගෙන ඇති දහ නම දෙනා අත්තනගල්ල මහේස්ත්‍රාත් අධිකරණයට ඉදිරිපත් කිරීමට නියමිතව තිබිණ.

ජ්‍යෙෂ්ඨ නියෝජ්‍ය පොලිස්පති දේශබන්දු තෙන්නකෝන් මහතා ගේ උපදෙස් පරිදි ගම්පහ ජ්‍යෙෂ්ඨ පොලිස් අධිකාරී ඉන්දික සිල්වා හා අත්තනගල්ල සහකාර පොලිස් අධිකාරී ප්‍රභාත් දයානන්ද යන මහත්වරුන් නිට්ටඹුව නගරයේ සිට  කරන ලද මෙහෙය වීම යටතේ නිට්ටඹුව පොලිස් ස්ථානාධිපති ප්‍රධාන පොලිස් පරීක්ෂක අජිත් කුමාර පිටිගල හා එහි රථ වාහන අංශයේ ස්ථානාධිපති ප්‍රධාන පොලිස් පරීක්ෂක මදුරප්පෙරුම යන මහත්වරු ප්‍රමූඛ එහි පොලිස් නිලධාරීන් පිරිසක් සෝදිසි මෙහෙයුමට සහභාගි වූහ.