(කාංචන කුමාර ආරියදාස)

මොරගහකන්ද ජලාශයේ ජල උල්පත් පිහිටි නාඋල ප්‍රාදේශිය  ලේකම් කොට්ඨාසයට අයත් ඕපල්ගල රක්ෂිතය ‍ ව්‍යාපාරිකයෙකු අත්පත් කරගෙන ඇතැයි කියමින් පරිසර සංවිධාන කිහිපයක් සහ ඔපාල්ගල  ගම්වැසියෝ පිරිසක් අද ( 25) නාවුල නගර මධ්‍යයේ උද්ඝෝෂණක් පැවැත්වූහ. 

අනතුරුව නාඋල වන සංරක්ෂණ දෙපාර්තමේන්තුවට අයත් කාර්යාලය ඉදිරිපිට ගොස් උද්ඝෝෂණයේ නිරත වූ ඔවුහු ඕපල්ගල රජයේ රක්ෂිතය අක්කර  තුන්සියයකට ආසන්න ප්‍රමාණයක් පෞද්ගලික ව්‍යාපාරිකයකු  විසින් අත්පත් කරගෙන මහා පරිමාණ පරිසර විනාශයක් සිදු කරන බව පැවසූහ.

නාඋල ප්‍රාදේශීය ලේකම්වරියගේ මැදිහත්වීම සහ විරෝධතා නිසා තාවකාලිකව ඉඩම් අත්පත් කර ගැනීම නවතා දමා තිබී නැවතත් රක්ෂිත ප්‍රදේශයට  ඇතුළු වී මහා පරිසර විනාශයක් සිදුකරන බවට ඔවුහු චෝදනා කරන්නට වූහ.

ඕපල්ගල රක්ෂිතයේ විශාල කඳු ගිරි සිඛර සහ ජෛව විවිධත්වයක් ඇති නකල්ස් කඳු පන්තියට අයත්  වනාන්තර බව ද ඔවුහු  කීහ.

නාඋල ප්‍රාදේශිය ලේකම් ආත්මා  ඩී. ජයසේකර  මහත්මියගෙන් විමසීමේ දී කියා සිටියේ තමන් මෙම ප්‍රදේශය පිළිබඳව සොයා බැලීමක් සිදු කළ බවය.  මහා පරිමාණයෙන් පරිසර විනාශයක් සිදුවෙමින් පවතින බවත් අධි  පරිසර සංවේදී කලාපය  කණ්ඩායමක් විසින් අත්පත් කර ගෙන තිබෙන බවද ඇය පැවසුවාය.

රාජකාරී මට්ටමෙන් කළ හැකි උපරිමය කර තිබෙන බවත් එහෙත් විවිධ බලපෑම් මත එම කණ්ඩායම් මෙම පරිසර පද්ධතියට ඇතුළු වී ඇතැයි ද ඇය වැඩිදුරටත් පැවසුවාය. 

ලංකා බැංකුවට සිය ඉඩම සින්න වූ බව  ව්‍යාපාරිකයා පැවසූවද, බැංකුවෙන් මේ වනතුරුත් තමන්ට ඉඩම්වල මායිම් පෙන්වීම සිදු නොකර ඇතැයිද ලේකම්වරිය පැවසූවාය.

ඡායාරූප - ඉන්දික අරුණ කුමාර