(තුසිත කුමාර ද සිල්වා)

විවිධ පළාත්වලින් යතුරුපැදි සොරාගෙන, කොටස් ගලවා විකිණීමේ ජාවාරමක නිරත වූ තිදෙනෙකු රුපියල් ලක්ෂ 25ක් වටිනා යතුරු පැදි හා ත්‍රිරෝද රථයක් සමඟ අත්අඩංගුවට ගත් බව බේරුවල පොලිසිය කියයි.

මෙම ජාවාරමේ මහ මොළකරු ගරාජයක සේවය කරන්නෙකි. සැකකරුවෝ පානදුර අලුබෝමුල්ල හා ජනප්‍රිය මාවත පදිංචි 40, 30 සහ 23වන වයස්වල පසුවන්නෝය.

මොවුන් තදින් මත්කුඩු පානයට ඇබ්බැහි වූවන් බවත්, ඒ සඳහා මුදල් සෙවීමේ අරමුණින් මෙලෙස ඕනෑම ස්ථානයක අගුළු දමා නවතා තිබෙන යතුරුපැදි හා ත්‍රිරෝද රථ සූක්ෂම ලෙස පණගන්වා රැගෙන ගොස් කොටස්වලට ගලවා ඇති බවද,  පොලිසිය පවසයි.

ඉකුත් පෙබරවාරි 16 වන දින ගාලුපාරේ මස්සල හන්දියට නුදුරින් තිබෙන සුපිරි වෙළඳසැලක රථ ගාලේ  තිබූ රුපියල් ලක්ෂ හතරක් පමණ වටිනා යතුරු පැදියක් එදින අලුයම 5.30 ට පමණ සොරකම් කර රැගෙන යන ආකාරය ආරක්ෂිත කැමරා දර්ශනවලින් පොලිසිය අනාවරණය කරගෙන ඇත. සැකකරුවන් පැමිණි යතුරුපැදියේ අංකය ඔස්සේ කළ පරීක්ෂණ මඟින් මෙම සොරකමේ සුලමුල සොයාගෙන තිබේ.

ඒ වනවිටත් වෙනත් පොලිස් බල ප්‍රදේශවලින් සොරකම් කරන ලද යතුරු පැදි 3ක කොටස්, බේරුවලින් සොරකම් කළ යතුරු පැදිය ඇතුළු තවත් යතුරුපැදි 3ක් සහ ත්‍රිරෝද රථයක් පානදුර අරුග්ගොඩ හා ජනප්‍රිය මාවතේ සැකකරුගේ ගරාජයේ සහ නිවසේ තිබී සොයාගෙන පොලිස් බාරයට ගෙන ඇත.

අත්අඩංගුවට ගත් සැකකරුවන් අද කළුතර අධිකරණය ඉදිරිපත් කිරීමට නියමිතය.