(ශාන්ත ප්‍රදීප් කුමාර කුලරත්න)

මහරගම නගරසභාව යටතේ ධාවනය වන වාහනවලට දෛනිකව ලබා දෙන  ඉන්ධනවලට භූමිතෙල් මිශ්‍ර කර ලබාදීමේ වංචාවක් පිළිබඳව වාර්තා වී  ඇතැයි මහරගම නාගරික මන්ත්‍රී  සුරේෂ් නිශාන්ත මහතා (ජ.වි.පෙ ) පැවසීය.

මේ බව අනාවරණය වී ඇත්තේ නගර සභාවට අයත් වාහනයක ඇති වූ කාර්මික දෝෂයක් යථා තත්ත්වයට පත් කිරීමට  ගිය අවස්ථාවකදී බව මන්ත්‍රීවරයා වැඩිදුරටත් කීය.

ලංකා ඛනිජ තෙල් සංස්ථාව මගින් නගර සභාවේ දෛනික අවශ්‍යතා සඳහා ඩීසල්  ලබාදෙන අතර එලෙස රැගෙන එන ඩීසල් සහිත  බවුසර්වලට  භූමිතෙල් මිශ්‍රවී ඇති බවට අනාවරණය වී ඇතැයි  මන්ත්‍රීවරයා කීය. මේ තත්ත්වය  තවදුරටත් පැවතියහොත්  නගර  සභාවට අයත් වාහනවල නඩත්තුව පිළිබඳව ඉදිරියේ දී ගැටලු රැසක් මතු විය හැකි බවද ඒ මහතා පැවසීය.

මේ පිළිබඳ පරීක්ෂණයක් පවත්වා සත්‍ය තත්ත්වය පැහැදිලි කර දෙන ලෙසත් එම පරීක්ෂණය ඛනිජ තෙල් සංස්ථාව මැදිහත් නොකර, ස්වාධීන ආයතනයක් හරහා සිදුකරන ලෙසට නගර සභාව ඉල්ලා සිටීමට පියවර ගන්නා බවත් නාගරික මන්ත්‍රී  සුරේෂ් නිශාන්ත මන්ත්‍රීවරයා වැඩිදුරටත් පැවසීය.

මේ  පිළිබඳව මහරගම නගර සභාවේ ලේකම් එස්.එ.කේ.එන්. ඉන්ද්‍රජිත් මහතාගෙන් විමසූ විට ඔහු පැවසුවේ , මේ පිළිබඳව මාසික සභා රැස්වීමේදී  මන්ත්‍රීවරයෙකු විසින් පැමිණිල්ලක් සිදුකර ඇති බවත් ඒ පිළිබඳව කඩිනමින් පරීක්ෂණයක් පවත්වා වරදකරුවන්ට නීතිමය පියවර ගන්නා බවත් ය.