(බන්දු තඹවිට සහ ප්‍රේමතිලක පෙරමුණ)

වැලිපැන්න,  මීගම දර්ගා නගරයේ පදිංචි පුද්ගලයකුට  නිවසක් තුළදී  මෝල්ගසකින් පහර දී ඝාතනය කර ඇතැයි වැලිපැන්න පොලිසිය කියයි.

මෙසේ මියගොස් ඇත්තේ  කාරියවසම් ඉදිපෙලගේ කපිල නමැති 35 හැවිරිදි අයෙකි.

 සිද්ධිය සම්බන්ධයෙන්  අත්අඩංගුවට ගත් සැකකරු  මීට වසරකට පමණ පෙර ඉතාලියේ රැකියාවක් කරමින් සිට ශ්‍රී ලංකාවට පැමිණ ඉඩම් මිලදීගෙන වැවිලි කටයුතුවල නිරත වන්නෙකු  ලෙස ජීවත් වී ඇති අතර  ඔහු  මිය පුද්ගලයාගේ ඥාතියකු  බව පොලිසිය පවසයි.

 මියගිය පුද්ගලයා ඊයේ (19)   රාත්‍රියේ පිහියක් රැගෙන පැමිණ තර්ජනය කරමින් සැකකරුගෙන්  මුදල් ඉල්ලු බවත්, තමා සතුව මුදල් නොමැති බව ඔහු   පැවසූවිට බැංකුවෙන් මුදල් රැගෙන දෙන්නැයි පවසා ඔහු  නිවස තුළ රඳවාගෙන සිටි බවත් සැකකරු පොලීසියට පවසා තිබේ.

අනතුරුව  ඝාතනයට ලක් වු පුද්ගලයා රාත්‍රීයේ  නින්දට ගිය අවස්ථාවේදී  ඔහුට මෝල් ගසකින් පහර දුන් බව  සැකකරු පොලිස් හදිසි ඇමැතුම් ඒකකය (119) හරහා  පොලීසියට දැනුම් දුන් බවත් ඔහු පොලීසිය හමුවේ වැඩි දුරටත් පාපොච්ඡාරණයක් කර ඇතැයි පොලීසය සඳහන් කරයි.
 
 මෙම ඝාතනය පිළිබඳව මහේස්ත්‍රාත් පරීක්ෂණය පැවැත්වීමට නියමිතය. 

වැලිපැන්න පොලිසිය පරීක්‍ෂණ පවත්වයි.