(නයනජිව බන්ඩාර)

වයස අවුරුදු 12 ක පිරිමි දරුවෙකුට පොල්ලකින් පහරදී ඝාතනය කිරීමේ සිද්ධියකට වරදකරු වූ අයෙකුට මොණරාගල මහාධිකරණ විනිසුරු එන්.ටී.එන් නිරෝෂා ප්‍රනාන්දු මහත්මිය අද (19) මරණ දඬුවම නියම කළාය.

වසර 27 ක දිර්ඝ නඩු විභාගයකින් අනතුරුව  මහාධිකරණ විනිසුරුවරිය මෙම තීන්දුන්ව ලබාදුන්නේය.

මෙසේ මරණ දඬුවම නියම වුයේ හම්බෙගමුව ජනපදයේ පදිංචි ආර්.එම් මුතුබංඩා නැමැති 63 හැවිරිදි පුද්ගලයෙකුටය.

1993 වසරේ ජුනි මස 23 දින හෝ ඊට ආසන්න දිනයකදී හම්බෙගමුව ජනපයේ පදිංචිව සිටි නලීන් ප්‍රියදර්ශණ නැමති 12 හැවිරිදි දරුවෙකුට පොල්ලකින් පහරදී ඝාතනයට ලක්කිරීම විත්තිකරුට එල්ල වූ චෝදනාවයි.

තණමල්විල පොලිසිය විත්තිකරුට එරෙහිව චෝදනා තුනක් යටතේ මොණරාගල මහාධිකරණයේ අධිචෝදනා ගොනුකර තිබුණි.

ජූරි සභාවක් ඉදිරියේ පැවති මෙම නඩු විභාගය දින අටක් අඛණ්ඩව විභාගයට ගැනුණි.මෙහිදි ජූරි සභාව විත්තිකරුට එරෙහිව තිබූ සියලු චෝදනාවන්ට විත්තිකරු වැරදිකරු ලෙස තීරණය කළහ.

විත්තිකරුට ඇති පළමු චෝදනාවට මරණ දඬුවම නියමකළ මහාධිකරණ විනිසුරුවරිය,දෙවැනි චෝදනාවට වසර 05ක සිර දඬුවම ක්ද, රුපියල් 20,000 ක දඩයක්ද නියම කළාය.

විත්තිකරු එම දඩමුදල් නොගෙවන්නේ නම් තවත් වසරක සිර දඬුවමක් නියම කරන බව විනිසුරුවරිය ප්‍රකාශ කළාය. ඊට අමතරව විත්තිකරුට එරෙහි තෙවැනි චෝදනාවට වසරක සිරදඩුවම් නියමකළ මහාධිකරණ විනිසුරු නිරෝෂා ප්‍රනාන්දු මහත්මිය රුපියල් 1000 ක දඩමුදලක්ද එය නොගෙවන්නේ නම් තවත් මාස 03ක සිරදඩුවමක්ද විත්තිකරුට නියම කළාය.

විත්තිකරුට මෙම චෝදනාවන්ට එවකට මොණරාගල මහාධිකරණ විනිසුරු ගිහාන් කුලතුංග මහතා මරණ දඩුවම නියමකළද විත්තිකරු එම තීන්දුවට එරෙහිව අභියාචනාධිකරණයට ඈපැලක් ඉදිරිපත්කර මෙම නඩු තීන්දුව ජූරි සභාවක් ඉදිරියේ විභාගයට ගන්නා ලෙස ඉල්ලා සිටියේය.

මෙම නඩුවේ පැමිණිල්ල වෙනුවෙන් රජයේ අධිනීතිඥ ජෙහාන් ගුණසේකර මහතා පෙනීසිටි අතර විත්තිය වෙනුවෙන් නීතිඥවරුන් සිවි දෙනෙක් පෙනීසිටියහ.