(ඩී.ජී.සුගතපාල)
 
ලංකාවේ පැරණිම දෙපාර්තමේන්තුව වන මිනින්දෝරු දෙපාර්තමේන්තුවේ 50 වැනි සර්වේයර් ජනරාල්වරිය ලෙස ශ්‍යාමලි චිත්‍රලේඛා  පෙරේරා මහත්මිය පත්ව ඇත.
 ඒ මහත්මිය හෙට (26) වැඩබාර ගැනිමට නියමිතය.

ක්‍රි.ව. 1800 දී ඉංග්‍රීසීන් විසින් ප්‍රථමයෙන් ශ්‍රී ලංකාවෙහි  ස්ථාපිත කරන ලද ශ්‍රී ලංකා මිනින්දෝරු දෙපාර්තමේන්තුවෙහි සර්වේයර්  ජනරාල් ධුරයට පත්වන ප්‍රථම කාන්තාව ඇය වීමද විශේෂත්වයකි.
 
 1961 වර්ෂයේ ජුලි මස 16 වන දින බණ්ඩාරගමදී  සහෝදර සහෝදරියන් සය දෙනෙකුගෙන් යුත් පවුලක තෙවැන්නා ලෙස උපත ලද ඇයගේ මව්පිය දෙදෙනාම විදුහල්පතිවරු වෙති.
 
කොළඹ දේවි බාලිකා විදුහලෙන් අධ්‍යාපනය ලැබූ ඇය පාසල් සමයේදී දීප්තිමත් ශිෂ්‍යාවක් මෙන්ම මලළ  ක්‍රීඩාවෙන්ද දීප්තිමත් ක්‍රීඩිකාවක් වුවාය.  පේරාදෙණිය විශ්ව විද්‍යාලයේ උසස් අධ්‍යාපනය හැදෑරු ඇය ප්‍රථම පන්තියේ භෞතික විද්‍යා ගෞරව උපාධිධාරිනියකි. 
 
ඇය 1985.03.01 දින මිනින්දෝරු දෙපාර්තමේන්තුවෙහි සහකාර මිනින්දෝරු අධිකාරිවරියක ලෙස දියතලාව මැනුම් හා සිතියම්ගත කිරීමේ පුහුණු ආයතනයේදී තම වෘත්තීය ජීවිතය ආරම්භ කළාය.
 
1991 වසරෙහි රාජ්‍ය කළමනාකරණ පශ්චාත් උපාධිය සඳහා නෙදර්ලන්තයේ අයි.ටී.සී. විශ්ව විද්‍යාලයට ඇතුලත්විය.  1993 දී භෞතික විද්‍යාව , ශුද්ධ ගණිතය හා ව්‍යවහාරික ගණිතය යන විෂයයන් සදහා දැක්වූ ඉහළ දක්ෂාතා වෙනුවෙන් ආචාර්ය කුමාරස්වාමි ත්‍යාගය ද දිනාගත් ඇය  බිම්සවිය ලෙසින් කා අතරත් ජනප්‍රිය දීපව්‍යාප්ත ව්‍යාපෘතියේ නව මුලිකත්වයද ගෙන කටයුතු කර ඇත.