(කේ බුද්ධික කුමාරසිරි)

මහජන සෞඛ්‍ය පරීක්ෂකවරු කණ්ඩායමක් විසින් මීගොඩ ආර්ථික මධ්‍යස්තානය සහ ඒ අවට වෙළඳසල් අද (7) අලුයම හදිසි පරීක්ෂාවට ලක්කර වෙළඳසල් පහකට නඩු පවරා තවත් වෙළඳසල් 15 කට රතු නිවේදන නිකුත් කිරීමට පියවර ගත් බව හෝමාගම සෞඛ්‍ය වෛද්‍ය නිලධාරී කාර්යාලය පවසයි.

අපිරිසිදු ලෙස සෞඛ්‍යාරක්ෂිත නොවන ආකාරයෙන් ආහාර ද්‍රව්‍ය තැනින් තැන දමා පවත්වාගෙන ගිය බේකරියකට මෙන්ම ආපනාශාලාවකට සහ කල් ඉකුත් වූ ආහාර ද්‍රව්‍ය තිබූ වෙළඳසල් තුනකට මෙලෙස නඩු පැවරීමට කටයුතු කර ඇත.

ආර්ථික මධ්‍යස්ථානයේ පවත්වාගෙන යනු ලබන වෙළඳසල් 20 ක් පරීක්ෂා කර කල් ඉකුත් වූ ආහාර ද්‍රව්‍ය හමු වූ සහ සෞඛ්‍යාරක්ෂිත නොවන ලෙස ආහාර ගබඩා කර තිබූ වෙළඳසල්  5 කට අධිකරණමය කි‍්‍රයාමාර්ග ගැනීමටත් සහල් පරිප්පු තිරිගු පිටි ආදී ආහාර ද්‍රව්‍ය සෞඛ්‍යාරක්ෂිත නොවන ලෙස ආහාර ගබඩා කර තිබූ වෙළඳසල් 15 කට රතු නිවේදන නිකුත් කිරීමටත් පියවර ගත් බවද එම කාර්යාලය පවසයි

මෙම වැටලීම සදහා හෝමාගම සෞඛ්‍ය වෙද්‍ය නිලධාරී වෛද්‍ය ජගත් කුමාර මහතාගේ උපදෙස් පරිදි හෝමාගම අධීක්ෂණ මහජන සෞඛ්‍ය පරීක්ෂක පි‍්‍රයන්ත විජේසූරිය මහතාගේ අධීක්ෂණයෙන් ගොඩගම කලාප භාර මහජන සෞඛ්‍ය පරීක්ෂක මයුරතිස්ස මහතාගේ සම්බන්ධීකරණයෙන් පාදුක්ක මහරගම සෞඛ්‍ය වෛද්‍ය නිළදාරී කාර්යාලවලට අයත් මහජන සෞඛ්‍ය පරීක්ෂකවරු සහභාගී වූහ.