(එම්. සුසිල් ප්‍රියන්ත සහ ගාමිණී මහදුර)

සිය ගම්මානවලට සන්නිවේදන  තරංග (සිග්නල්) අවහිර කර  ඇතැයි කියමින් බූස්ස අධි ආරක්ෂිත බන්ධනාගාරය අවට ගම්මාන 20ක පමණ ජනතාව අද (9) ගාලුපාරේ බූස්ස මංසන්ධියේ සිට උද්ඝෝෂණයක් පැවැත්වූහ.
                    
බූස්ස බන්ධනාගාරය අධි ආරක්ෂිත බන්ධනාගාරයක් කොට දිවයිනේ නමගිය සංවිධානාත්මක අපරාධකරුවන් එහි ගෙනවිත් දැමීමත් සමගම ඔවුනට දුරකතන භාවිතා කිරීම නතර කිරීමේ අරමුණින් සන්නිවේදන තරංග අවහිර කිරීම නිසා සිය ගම්මානවලට මේ තත්වය උදාවූ බව උද්ඝෝෂකයෝ පැවසූහ.
               
බූස්ස අධි ආරක්ෂිත බන්ධනාගාරයේ සිට ගුවන් දුර සැතපුමක් ඇති ගම්මාන වලට මේ සන්නිවේදන තරංග අවහිරතාව බලපා ඇති බවද ඔවුහු පැවසූහ.
     
මේ නිසා බූස්ස, පිටිවැල්ල, ගිංතොට, කදූරුපේ, මලිදූව, ඇතුළු ගම්මාන 20කට පමණ මේ සන්නිවේදන  තරංග අවහිරතාව බලපා තිබෙන බව උද්ඝෝෂකයෝ පැවසූහ.
      
මේ තත්ත්වය නිසා කොවිඩ් වසංගතය නිසා ඔන්ලයින් තාක්ෂණය ඔස්සේ තමන්ට නිවසේ සිට රාජකාරි කටයුතු කිරීමට නොහැකිවී ඇති බවත් තමන්ගේ දරුවන්ට අන්තර්ජාලය ඔස්සේ නිවසේ සිට අධ්යාවපන කටයුතු කරගෙන යාමට නොහැකි වී ඇති බවත් එමෙන්ම හදිසි දුරකථන පණිවිඩයක් ලැබීමට හෝ ලබා දීමට නොහැකිවී තිබෙන බවත් ඔවුහු කීහ.