(සමන් පාලිත නානායක්කාර)

බදුල්ල දිස්ත්‍රික්කයේ  ප්‍රදේශ කිහිපයක්  හරහා හමාගිය දැඩි සුළං තත්ත්වයක් හේතුවෙන් ප්‍රාදේශීය ලේකම් කොට්ඨාස පහක නිවාස රැසකට අද (1) සුළු ප්‍රමාණයේ හානි සිදු වී ඇතැයි ද එය හදිසි ආපදා තත්ත්වයක් නොවන  බවද බදුල්ල   ආපදා කළමනාකරණ ඒකකයේ සහකාර අධ්‍යක්ෂ ඊ එම් එල් උදයකුමාර මහතා පැවසීය .

ඇල්ල, බදුල්ල, සොරණාතොට, පස්සර, රිදීමාලියද්ද යන ප්‍රාදේශීය ලේකම් කොට්ඨාස වලට මෙම සුළං තත්ත්වය බලපෑ බවත් එම ප්‍රදේශවල  විදුලි කණු කඩා වැටීම ගස් කඩා වැටීම් හා වහළ සෙවිලි තහඩු ගැලවී යාම වැනි සුළු හානි සිදුවී ඇතැයි ද බදුල්ල ආපදා කළමනාකරණ මධ්‍යස්ථානය සඳහන් කරයි .

මේ වනවිට සුළං තත්වය පහව ගොස් ඇති බවද එය හදිසි ආපදා තත්ත්වයක් ලෙස සැළකිය යුතු නොවන බව ද ආපදා කළමනාකරණ මධ්‍යස්ථානය සඳහන් කරයි.

ඒ ඒ ප්‍රදේශවල ග්‍රාම නිලධාරීහු  හා ආපදා කළමනාකරණ නිලධාරීහු  සිදු වූ හානි පිළිබඳව පරීක්ෂණ පවත්වති.