(චන්ද්‍රසිරි   ගුණසේකර)

ඇල්පිටිය පොලිස් වසමට අයත් 11කණුව බදුගොඩවත්ත ප්‍රදේශයේ පෞද්ගලික ඉඩමක කැණීම් කරමින් සිටියදී ඇල්පිටිය  පොලිසිය විසින් අත්අඩංගුවට ගෙන මහේස්ත්‍රාත් අධිකරණය වෙත ඉදිරිපත් කළ යුද හමුදා කපිතාන්වරයා  ජුනි මඩ 30 දා දක්වා රක්ෂිත බන්ධනාගාර ගත කරන ලෙස ඇල්පිටිය මහේස්ත්‍රාත් ගයාන් මීගහගේ මහතා   නියෝග කර තිබේ.

මෙම පුද්ගලයා දැනටද හමුදා සේවයේ යෙදී සිටින අයකු බවත් පොලිසියට ලද තොරතුරක් මත පොලිසිය එහි යනවිට කැණීම් කරමින් සිටි අනෙක් පිරිස පලාගිය බවද පොලිසිය පවසයි.

මෙහි කැණීම් කරමින් සිටි පිරිස මෙම කපිතාන් වරයා යටතේ සේවය කරන හමුදා නිලධාරින් විය යුතු බවටද පොලිසිය සැක පහළ කරයි.

මෙම ස්ථානයේ අඩි විස්සක් පමණ කැනීම් කර ඇති අතර සැකකරු පොලිසියට පවසා ඇත්තේ ජලය ලබා ගැනීම සදහා මෙම ස්ථානය හාරමින් සිටි බවය.

එහෙත් පොලිසිය කරන ලද ප්‍රශ්න කිරිමේදී ඔහු පවසා ඇත්තේ සිය මියගිය පියා සිහිනයෙන් කිහිප දිනක් මේ ස්ථානය කැණීම් කරන ලෙස කළ ඉල්ලිම මත මෙසේ කල බවය. මෙම  ස්ථානය ආවරණය කර තිබී ඇති අතර  දිවා රාත්‍රි දෙකේම මෙම කැණීම් සිදු කරන්නට ඇතැයි පොලිසිය විශ්වාස කරයි .

කැනීම් සිදු කිරිම සදහා භාවිතා කරමින් සිටි අලවංගු ,ගල්කඩන උපකරණ ,විශාල ප්‍රමාණයේ වතුර ඉසින මෝටර් දෙකක් යකඩ ඉණිමගක් ඇතුළු උපකරණ ද එම සමහර භාණ්ඩ දමා තිබූ වෑන් රථයක් ද පොලිසිය විසින් අත් අඩංගුවට ගෙන තිබේ.
එම ස්ථානයේ බැකෝ යන්ත්‍රයක් ද තිබූ අතර එය මෙම කැණීම් සදහා යොදා ගත්තේද යන්න පිළිබදවද පොලිසිය පරීක්ෂණ පවත්වයි .