(විජේරත්න රත්නායක )
 
කරුණු කීපයක් මුල්කරගෙන ඌව පළාතේ පළාත් රෝහල් ඇතුළු සෞඛ්‍ය ආයතන 58 ක සේවකයින් අද (26) උදෑසන සිට වැඩ වර්ජනයක් ආරම්භ කර තිබේ.
 
අතිකාල දීමනා කපාහැරීම, උත්සව අත්තිකාරම් ප්‍රමාද කිරීම, ගමන් වියදම් කපා හැරීම, ගිලන් රථ සහායක අතිකාල කප්පාදුව යන කරුණු මුල් කරගනිමින් දියතලාව මූලික රෝහල හැර ඌව පළාත් සභාවට අයත් සෙසු සියළු පළාත් සෞඛ්‍ය ආයතනවල උපස්ථායක, කණිෂ්ඨ සේවක, විදුලි සෝපාන ක්‍රියාකරු, මැහුම් සේවිකා, අරක්කැමි, සෞඛ්‍ය කාර්ය සහායක ඇතුළු සේවක සේවිකාවන් 2200 ක් පමණ මෙම වර්ජනයට එක්ව සිටිති.
 
ඌව පළාතේ සෞඛ්‍ය වෛද්‍ය නිළධාරී කාර්යාල 27 ක්,  මූලික රෝහල් 05 ක්,  දිසා රෝහල් 12 ක්, ප්‍රාදේශීය රෝහල් 14 ක් මෙම වර්ජනයට එක්ව සිටින අතර සමස්ථ ලංකා සුව සේවා සංගමයේ ඌව පළාත් ශාඛාව මෙම වර්ජනය සංවිධානය කොට තිබේ.
 
සිය ගැටළුවලට කඩිනම් විසඳුමක් ලබා නොදුන හොත් ඉදිරියේදී දැඩි වෘත්තීය ක්‍රියාමාර්ගයකට යන බව එම සංගමයේ ඌව පළාත් ලේකම් ටී.එම්.අසංක ඉන්දික මහතා පැවසීය.