(තිලකරත්න දිසානායක)

අත්තනගලු ඔයේ ජල මට්ටම අද දහවල් 12 වනවිට සුළු ගංවතුර මට්ටම දක්වා ඉහළ ගිය බව  දිස්ත්‍රික් වාරිමාර්ග ඉංජිනේරු කාර්යාලය සදහන් කරයි.

අත්තනගලු ඔයෙහි සුළු ගංවතුර මට්ටම මීටර් 4 . 4 වන අතර මෙහි දූනමලේ ජල මාපකයෙහි ජල මට්ටම දහවල් 12 වනවිට මීටර් 4 . 44 දක්වා ඉහළ ගොස් තිබූ බැවින් මෙය සුළු ගංවතුර මට්ටම ඉක්මවා ගොස් ඇති තත්ත්වයක් බව දිස්ත්‍රික් වාරිමාර්ග ඉංජිනේරු චින්තක සුරවීර මහතා කියයි.

මෙම තත්ත්වය මත ඉදිරියට ඇතිවන වර්ෂාව හේතුවෙන් අත්තනගලු අවට සහ පහත් බිම් ප්‍රදේශයන් ජලයෙන් යටවිය හැකි බැවින් එම ප්‍රදේශයන්හි ජනතාව දැඩි අවධානයෙන් පසුවිය යුතු බවද හෙතෙම සඳහන් කළේය.