සිතුම් චතුරංග

ඇඳිරිනීතිය ක්‍රියාත්මකවූ කාලසීමාවේදී යාපනය,පේදුරුතුඩුව, මන්දිකෙයි යුද හමුදා මාර්ග බාධකයේදී ඊයේ (14) රාත්‍රියේ අණ නොතකා ගමන්ගත් යතුරු පැදියකට සිදුකළ වෙඩි තැබීමකින් පුද්ගලයෙකු තුවාල ලබා රෝහල්ගතකර ඇතැයි යාපනය පේදුරුතුඩුව පොලිසිය පවසයි.

මාර්ග බාධකය අසල රාත්‍රී දහයට පමණ යතුරු පැදියකින් ගමන්ගත් පුද්ගලයින් දෙදෙනකු නොනවත්වා ධාවනය කොට පසුව ඔවුන් විසින් හමුදා සෙබලුන් වෙත ගල්මුල් ප්‍රහාරයක් එල්ලකර තිබූ අතර එම ගල් ප්‍රහාර හේතුවෙන් එක් හමුදා සාමාජිකයකු සුළු තුවාල ලබා පේදුරුතුඩුව රෝහල වෙත ඇතුළත් කළ බවද පොලිසිය පැවසීය.

එම යතුරු පැදිය පලාගොස් මිනිත්තු 30 පමණ පසු පැමිණ ඇති යතුරු පැදියකටද නවත්වන ලෙස යුද හමුදාව විසින් දැනුම්දී ඇති අතර එහිදී අධික වේගයෙන් යතුරු පැදිකරු පැනයන්න උත්සහකර ඇති බව පොලිසිය පැවසීය.

එහිදී යුද හමුදාව විසින් වෙඩි ප්‍රහාර කිහිපයක් එල්ලකොට ඇති අතර යතුරුපැදිකරු තුවාල ලබා ඇති අතර ඔහු නිවසවෙත ගොස් පසුව පේදුරුතුඩුව, මන්දිකෙයි රෝහල වෙත ඇතුලත්වී තිබේ.

එලෙස වෙඩි තැබීමෙන් තුවාල ලබා ඇත්තේ යාපනය , පේදුරුතුඩුව පදිංචි පසුපති අනුසන් නැමති 23 හැවිරිදි පුද්ගලකුවේ.

තුවාලකරුගේ පාදට හා පිට ප්‍රදේශයට වෙඩිවැදී තුවාල සිදුව ඇතැයිද පොලිසිය පැවසූහ.

ආරක්ෂක මුරකපොල්ල වෙත ගල්ප්‍රහාර එල්ලකළකොට හමුදා සෙබලකු තුවාල කිරීම සම්බන්ධයෙන් පිරිස අත්අඩංගුවටගැනීම සඳහා විමර්ශන සිදුකරන බවත් පේදුරුතුඩුව පොලිසිය පැවසීය.

සිදුවීම සම්බන්ධයෙන් පේදුරුතුඩුව පොලිසිය වැඩිදුර පරීක්ෂණ මෙහෙයවයි.