(නිශාන්ත කුමාර)

මීගහකිවුල කණුගොල්ල ගම්මානයේ වෙල්යායක ගොයම් නෙළමින් සිටි පිරිසකට අද (15)   එල්ල වූ බඹර ප්‍රහාරයකින් කුඹුරේ සිටි 20කට අධික සංඛ්‍යාවක් තුවාල ලබා ඇති අතර අසාධ්‍ය තත්වයේ පසුවූ   කාන්තාවක් ඇතුළු පස් දෙනෙකු මීගහකිවුල රෝහලට ඇතුළත් කර  ඇතැයි පොලීසිය කියයි.  

මෙලෙස රෝහල්  ගත කර ඇත්තේ මීගහකිවුල කණුගොල්ල ගම්මානයේ පදිංචි පිරිසකි. තුවාල ලැබූවන් වයස අවුරුදු 45-65 ත් අතර පසුවෙති.

වෙල්යාය ආසන්නයේ වූ කෝන් ගසක තිබූ බඹර කූඩුවක් ඇවිස්සීමෙන් මෙම ප්‍රහාරය එල්ල වූ බව තුවාල ලැබූවෝ පවසති.

ගොයම් නෙළමින් සිටි පිරිස වෙත එක්වරම කඩා වැදුණු බඹර රංචුව ගොවීන්ට පන්න පන්නා පහර දී ඇති අතර බොහෝ පිරිසක්   බඹරුන්ගෙන් බේරීම සඳහා කැලෑවට වැදී ඇත. බඹරුන්ට බියේ දිවගිය කීප දෙනෙකු ඇද වැටීමෙන්ද තුවාල ලබා ඇත.