ජුඩ් සමන්ත
 
අධ්‍යාපන පොදු සහතික පත්‍ර උසස් පෙළ විභාගය පැවැත්වෙන පුත්තලම දිස්ත්‍රික්කයේ විභාග මධ්‍යස්ථාන අවට ඩෙංගු මදුරුවන් මර්දනය කිරීම සඳහා දූමායන කටයුතු සිදු නොකිරීම නිසා කිසියම් දරුවෙකු ඩෙංගු මදුරු දෂ්ඨනයකට ලක් වුවහොත් එහි වගකීම වයඹ පළාතේ සෞඛ්‍ය බලධාරීන් විසින් බාර ගත යුතු යැයි මහජන සෞඛ්‍ය පරීක්ෂකවරුන්ගේ සංගමයේ සභාපති උපුල් රෝහණ මහතා පැවසීය.


පුත්තලම දිස්ත්‍රික්කයේ සේවය කරන මහජන සෞඛ්‍ය පරීක්ෂකවරුන් විසින් ආරම්භ කර ඇති වෘත්තීය ක්‍රියා මාර්ගයක් හේතුවෙන් අධ්‍යාපන පොදු සහතික පත්‍ර උසස් පෙළ විභාගය පැවැත්වෙන මධ්‍යස්ථාන අවට ඩෙංගු මදුරුවන් මර්දනය කිරීම සඳහා දූමායන කටයුතු සිදු නොවේ.


මේ සම්බන්ධයෙන් අප කළ විමසීමකදී මහජන සෞඛ්‍ය පරීක්ෂකවරුන්ගේ සංගමයේ සභාපති උපුල් රෝහණ මහතා මෙසේද පැවසීය.


“තලවිල දේවස්ථානයේ පසුගිය මාර්තු මංගල්‍යයේ විශේෂ රාජකාරි සිදු කළ මහජන සෞඛ්‍ය පරීක්ෂකවරුන්ට අතීකාල දීමනා මෙතෙක් ගෙවා නැහැ. තලවිල දේවස්ථානයේ විශේෂ රාජකාරි සදහා යොදවන මහජන සෞඛ්‍ය පරීක්ෂකවරුන් විසින් සිදු කරන්නේ දුෂ්කර සේවයක්. තම නිවෙස් වලින් බැහැරව දින කීපයක් ඔවුන් තලවිල දේවස්ථාන භූමිය තුළ රැදී සිටින බැතිමතුන්ගේ සෞඛ්‍ය තත්ත්වය වෙනුවෙන් ක්‍රම කීපයකට රාජකාරි සිදු කරනවා. ඇත්තෙන්ම ඔවුන් රාජකාරියෙන් ඔබ්බට ගොස් සිදු කරන්නේ සේවයක්. ඒ නිසා ඔවුන්ට අතීකාල දීමනා ලබාදීම බලධාරීන්ගේ යුතුකමක්. එමෙන්ම වගකීමක්.නමුත් ඔවුන් ඒ වගකීම මෙන්ම යුතුකමද මේ දක්වා ඉටු කර නැහැ.
 
අප මේ සම්බන්ධයෙන් සාකච්ඡා වට කීපයක් පැවැත්වුවා.නමුත් කිසිදු ප්‍රතිඵලයක් නැහැ. වයඹ ප්‍රධාන ලේකම්වරයා සමඟ සාකච්ඡාවක් පැවැත්වීමට ඉල්ලීමක් කළත් එය ලැබුනෙත් නැහැ.ඒ නිසා තමයි අපි වෘත්තීය ක්‍රියා මාර්ගයකට යොමු වුනේ.


මුලින්ම අපි සිදු කළේ මෙවර තලවිල දේවස්ථානයේ අගෝස්තු මංගල්‍යට විශේෂ රාජකාරි සදහා වාර්තා නොකිරීම.දෙවනුව පසුගිය 03 වැනිදා පුත්තලම දිස්ත්‍රික්කයේ සියළුම මහජන සෞඛ්‍ය පරීක්ෂකවරුන් ලෙඩ නිවාඩු දමා සේවයට වාර්තා කිරීමෙන් වැළකී සිටියා. 04 වැනිදා සිට සේවයට වාර්තා කළත් කේෂත්‍ර රාජකාරි වලින් වැළකී සිටීමට තීරණය කලා.