(සිතුම් චතුරංග)

යාපනය, නුවර ඒ නවය මාර්ගයේ වවුනියාව, නවගමුව ප්‍රදේශයේ දී අද (15) උදෑසන ලොරි රථයක් ටිපර් රථයක මුහුණට මුහුණ ගැටී පුද්ගලයකු තුවාල ලබා රෝහල් ගතකළ බව ඊරට්පෙරියකුලම පොලිසිය පවසයි.

වවුනියාව සිට අනුරාධපුර බලා ධාවනය වූ ලොරි රථයක් ඉදිරියෙන් පැමිණි ටිපර් රථයේ ගැටී මෙම අනතුර සිදුව ඇති අතර එහිදී ටිපර් රථ රියදුරු තුවාල ලබා රෝහල් ගතකළ බවද පොලිසිය සඳහන් කළේය.

සිදුවූ අනතුරින් ටිපර් රථ රියදුරු පැයකට ආසන්න කාලයක් රථයේ සිරව සිටි බවත් ප්‍රදේශවාසීන් දැඩි පරිශ්‍රමයක් දරා තුවාලකරු පිටතට ගෙන වවුනියාව මහ රෝහල වෙත ඇතුළත් කළ බව පොලිසිය පවසයි.

ටිපර් රථයේ රියදුරු විසින් තවත් වාහනයක් පසුකර යෑමට ගත් උත්සහයේ දී ලොරි රථයේ ගැටී ඇති බවට සිදුකළ විමර්ශනවලදී අනාවරණය වූ බවද පොලිසිය කියයි.

අනතුර හේතුවෙන් පැය දෙකකට ආසන්න කාලයක් ඒ-9 මාර්ගයේ ගමනාගමන කටයුතු වලටද බාධා එල්ල වී තිබිණි.

අනතුර හේතුවෙන් ලොරි රථය හා එහි රියදුරු පොලිස් බාරයට ගෙන ඇති අතර ඊරට්පෙරියකුලම රථවාහන පොලිසිය වැඩිදුර පරික්ෂණ පවත්වයි.