(ජයන්ත සමරකෝන් )
විසි වසරකට අධික කාලයක් තිස්සේ හොරෙන් ජලය ගත් බවට වරඳ පිළිගත්  ජාඇල , පමුණුගම ප්‍රදේශයේ හෝටල් හිමිකරුවෙකුට රුපියල්  ලක්ෂ 19 ක  දඩ මුදලක් ගෙවීමට  නියම කළ බව ජාතික ජලසම්පාදන ජලාපවාහන මණ්ඩලය පවසයි.

රුපියල් 1 46,000 ජල බිල් පතක්  නොගෙවීම සම්බන්ධයෙන්  මෙම සංචාරක හෝටලයේ ජල  සම්බන්ධතාවය විසන්ධි කර වසර ගණනාවක සිටම එහි හිමිකරු ළිඳකින් ජලය ලබා ගන්නා මුවාවෙන් මණ්ඩලයේ  නිලධාරීන් නොමග යවා ඇතැයිද කියයි.

 විසන්ධි කරණ ලද ජල සම්බන්ධතාවයට පිටතින් මීටරයට හසු නොවන අයුරින් අමතර ජල සම්පාදන වයරයක් යොදාගනිමින් දිගින් දිගටම මෙම ජලය ලබා ගැනීම සිදු කර ඇති බව පරීක්ෂණ වලින් හෙළි වී තිබේ.

 මෙම සංචාරක හෝටලය  පිහිනුම් තටාකයක් ඇතුළු කාමර ගණනාවකින් සමන්විත අක්කර 3 ක පමණ භූමියකින් යුක්ත බවද පැවසේ.
 කොළඹ අනවසර ජල වැටලීම්  අංශයට ලැබුණු පැමිණිල්ලක් මත මෙම වැටලීම සිදු කර ඇතැයි ද මණ්ඩලය සඳහන් කරයි.