(අජිත්ලාල් ශාන්තඋදය)

සබරගමු පළාතේ නව ආණ්ඩුකාරවර නිලූකා ඒකනායක මහත්මිය අද (20) පෙරවරුවේ මහා සංඝරත්නයේ ආශිර්වාද මැද රත්නපුර නව නගරයේ පිහිටි ආණ්ඩුකාරවර කාර්යාලයේ දී සිය තනතුරේ වැඩ බාරගත්තාය.

සබරගමු පළාත් සභා සභාපති කංචන ජයරත්න සහ සබරගමු පළාත් ප‍්‍රධාන ලේකම් හේරත් පී කුලරත්න යන මහත්වරුන්ගේ ප‍්‍රධානත්වයෙන් ආණ්ඩුකාරවරිය පිළිගෙන පළාත් සභා සංකීර්ණය වෙත පෙරහරින් කැඳවාගෙන එනු ලැබීය.

පොලිස් උත්තමාචාර පිළිගැන්වීමෙන් පසු රතු පළස මතින් ආණ්ඩුකාරවර කාර්යාලය වෙත ඇය කැඳවාගෙන යනු ලැබීය.

ඉන් අනතුරුව අමරපුර මහා නිකායේ ඉද්දමල්ගොඩ පාර්ශවයේ මහානායක මඩලගම වජිරබුද්ධි නාහිමියන් ප‍්‍රධාන මහා සංඝරත්නයේ සෙත්පිරිත් සඡ්ඣායනය මැද නව තනතුරේ වැඩ බාරගනු ලැබීය.

සබරගමු පළාත් සභා ඉතිහාසයේ පළමු ආණ්ඩුකාරවරිය මෙන්ම දහවන ආණ්ඩුකාරවරයා වන්නේ ද නිලූකා ඒකනායක මහත්මියයි. ඇය පසුගිය 12දින සිට සබරගමු පළාත් ආණ්ඩුකාරවරිය ලෙස ජනාධිපති මෛත‍්‍රීපාල සිරිසේන මහතා විසින් පත්කරනු ලැබීය.

පළාත් ආණ්ඩුකාර ලේකම් ලලිත් දොඩම්කොටුව, සියලූම අමාත්‍යාංශ ලේකම්වරු, පළාත් සභාවේ හිටපු මහා මාර්ග, ක‍්‍රීඩා හා සංචාරක අමාත්‍ය අතුල කුමාර රාහුබද්ධ, මධ්‍යම රජයේ හිටපු අමාත්‍යවරයෙකු වූ නන්දිමිත‍්‍ර ඒකනායක, ගැමුණුහේවා රෙජිමේන්තු මධ්‍යස්ථානාධිපති බි‍්‍රිගේඩියර් ජයම්පති තිලකරත්න, සබරගමු පළාත් නියෝජ්‍ය පොලිස්පති පද්මසිරි මුණසිංහ, රත්නපුර දිස්ත‍්‍රික් ලේකම් මාලනී ලොකුපෝතාගම යන මහත්ම මහත්මීහූ ද ඇතුලූ විශාල පිරිසක් මෙම අවස්ථාවට එක්ව සිටියහ.