(එස්. ඩී.කොඩිකාර)
 
කඹුරුගමුව ගරාඩුව ශ්‍රී නදීතීරාරාම විහාරස්ථානයේ වසර 100ට  වඩා පැරණි සංඝාවාස ගොඩනැගිල්ල අද  (10)  කඩාවැටීම හේතුවෙන් සාමණේර හිමිනමක් සහ දායක සභාවේ ලේකම්වරයා තුවාල ලබා ඇතැයි කොටවිල පොලිසිය කියයි.

ඔවුන්ව කඹුරුගමුව රෝහලට ඇතුළත් කිරීමෙන්  අනතුරුව වැඩිදුර ප්‍රතිකාර සඳහා මාතර මහ රෝහලට මාරු කර යවා ඇත.

දායකයෙකු අද හීල්දානය සංඝයා වහන්සේ නමකට පූජාකරන  අවස්ථාවේ මෙම ගොඩනැගිල්ල කඩා වැටී ඇත.

සංඝාවාස ගොඩනැගිල්ල කඩා වැටීමෙන් තුවාල ලබා ඇත්තේ 15 හැවිරිදි රන්සෑගොඩ ඤාණරතන  හිමියන් සහ ගරාඩුව ප්‍රදේශයේ පදිංචි  දායක සභාවේ ලේකම්වරයා ය.

ගොඩනැගිල්ල සම්පූර්ණයෙන්ම  විනාශ වී ඇති අතර  බුදු පිළිමවහන්සේට කිසිදු හානියක් සිදු වී නොමැත.

මෙම ගොඩනැගිල්ල කලක සිට  බිත්ති පුපුරා දිරාපත් වී  යෑම සම්බන්ධයෙන් පුරාවිද්‍යා දෙපාර්තමේන්තුවට ලිඛිතව දන්වා ඇති බව දායක සභාව  සඳහන් කරයි.

සිද්ධිය සම්බන්ධයෙන් කොටවිල පොලිසිය වැඩිදුර පරීක්ෂණ පවත්වයි.