(දයාරත්න ඇඹෝගම)

පලුගස්වැව ප්‍රාදේශීය ලේකම් කොට්ඨාශයේ සියඹලාදමන ප්‍රදේශයේ ගෙවත්තක් වටා ඇද තිබු විදුලි රැහනක ගැටිමෙන් අවුරුදු 45 ක් පමණ වයසැති වන අලියෙකු මිය යාමේ සිද්ධියට 65 හැවිරිදි පුද්ගලයෙකු අත්අඩංගුවට ගත්බව  රිටිගල අඩවි ආරක්ෂක නිලධාරි එම්.ටි.පුෂ්පකුමාර මහතා පැවසිය.

මෙසේ අත්අඩංගුවට ගෙන ඇත්තේ නාමල්පුර,සියඹලාගස්දමන ප්‍රදේශයේ පදිංචි 65 හැවිරිදි පුද්ගලයෙකි.

මෙම පුද්ගලයා සිය ගෙවත්තේ සිටුවා ඇති භව බෝග වන අලීන් ගෙන් ආරක්ෂාකර ගැනිම සදහා ගෙවත්ත වටා අනවසර විදුලි රැහැනක් යොදා තිබියදි  ඊයේ (20)දින අලුයම වන අලියෙකු ගැටි මිය ගොස් සිටියදි රිටිගල වනජීවි කාර්යාලයේ නිලධාරින් විසින් සොයා ගෙන තිබුණි.

වයස අවරැදු 45 පමණ වන මෙම වන අලියා අඩි 10 කින් පමණ උසින් යුක්තය. වන අලියාගේ පශ්චාත් මරණ පරික්ෂණය පශු වෛද්‍ය චන්දන ජයසිංහ මහතා විසින් සිදුකළ අතර එහිදි වන අලියා මිය යාමට හේතුව විදුලිසැර වැදිමෙන් බවට නිගමනය කොට තිබේ.මේ සම්බන්ධයෙන් අත්අඩංගුවට ගනු ලැබු ගෙවත්තේ හිමිකරැවා අද (20)දින අධිකරණයට ඉදිරිපත් කිරීමට නියමිතය .