(ඔගස්ටින් ප්‍රනාන්දු) 
      
හලාවත පුත්තලම මාර්ගයේ මදුරන්කුලිය සෙම්බැට්ට ප්‍රදේශයේ දි පාපැදියක් පදිමින් සිටි නව හැවිරිදි වියේ දරුවකු බවුසරයකට යටවීමෙන් අනතුර සිදුවු ස්ථානයේ දීම ඊයේ ( 16) රාත්‍රියේ මිය ගොස් ඇති බව මුන්දලම පොලිසිය කියයි.
 
මිය ගොස් ඇත්තේ මදුරන්කුලිය සෙම්බැට්ට ප්‍රදේශයේ විසු දිල්ශාන් මධුසංඛ නමැති දරුවාය.
 
මෙම දරුවා හා තවත් දරුවෙකු පාපැදියකින් සිය නිවසේ සිට අසළ වු වෙළඳසැලක් වෙත පැමිණි අවස්ථාවේ දි කන්කසන්තුරේ සිට සිමෙන්ති කුඩු ප්‍රවාහනය කළ බවුසර් රථයකට යටවී ඇති බව පොලිසිය කියයි.

මෘත ශරීරය මේ වන විට පුත්තලම මූලික රෝහල් මෘත ශරීරාගාරයේ තැන්පත් කර ඇති අතර මරණ පරීක්ෂණ කටයුතු අද ( 17 ) සිදු කිරීමට නියමිතව ඇත. 

අනතුර කළ බවුසරයේ රියදුරු අත්අඩංගුවට ගෙන ඇත.
 
මුන්දලම පොලිසිය වැඩිදුර පරීක්ෂණ පවත්වයි.