විල්පත්තු මායිමේ පිහිටි ඓතිහාසික තන්තිරිමලේ ලංකාදීප ආලෝක පූජාව 12 වැනි වරටත් ජුනි පළමු වැනි දා සහ දෙවැනි දා පැවැත්වේ.

ක්‍රිස්තු පූර්ව 543 සඟමිත්  තෙරණිය උතුරේ දඹකොල පටුනේ සිට මල්වතු ඔය ඔස්සේ අනුරාධපුරය දක්වා ශ්‍රී මහා බෝධියේ දක්ෂිණ ශාඛාව වැඩමවාගෙන එද්දී එවකට තිවක්ක බමුණුගම නමින් හැඳින්වූ තංතිරිමලේ ගල් තලාවේ රැය පහන් කළ බව ඉතිහාසය කියයි.

තන්තිරිමලේ චන්දරතන තන්තිරිමලේ රාජ මහා විහාරාධිපති නාහිමියන්ගේ අනුශාසකත්වයෙන් සීමා සහිත විජය පුවත්පත් සමාගම මේ ආලෝක පූජාව පවත්වයි.

හිටපු ඇමැතිවරයකු වූ සිරිල් මැතිව් මහතා මහ වන මැද පිහිටි මෙම පුද බිම පූජා භූමියක් බවට පත් කළේය. අපවත්වී වදාළ කුඩාකෝංගස්කඩ විමලඥාන නාහිමියන් 1960 දී මැදවච්චියේ සිට ගැමියන් පිරිසක් ද සමඟ පැමිණ වල් බිහි වී තිබූ මෙම පුදබිම සොයා ගත්තේය.

විහාරස්ථානය ගොඩ නැගී ඇත්තේ අක්කර 250ක මහා ගල්තලාවක් මැදය. අඩි 45ක් දිග ශෛලමය සැතපෙන පිළිමයක් ද, අඩි අටක් උස සමාධි පිළිමයක් ද, පොත් ගුලක්, පධානඝරයක්ද, භාවනා කුටි, ප්‍රාග් ඓතිහාසික යුගයේ බව කියන ලෙන් සිතුවම් ද එහි ඇත.

අනුරාධපුර තිසාවැව අසල සිට ඇලයාපත්තුව ඔස්සේ මහ විලච්චිය ගමට ළඟා වීමේදී තන්තිරිමලේ පුද බිම හමුවේ. අනුරාධපුරයේ සිට දුර කිලෝ මීටර 45කි.

(ඡායාරූප අතුල බණ්ඩාර)

(පුස්තකාල ඡායාරූප දෙකකි)