(ටී.කේ.ජී.කපිල)

ව්‍යාජ ඉතාලි ගුවන් ගමන් බලපත්‍රයක් උපයෝගී කර ගනිමින් ලංකාවට ඇතුළු වීමට තැත් කළ 18 හැවිරිදි විදේශීය තරුණයෙකු කටුනායක ගුවන් තොටුපළේ දී අත්අඩංගුවට ගෙන ඔහු පැමිණි ගුවන් යානයෙන්ම ආපසු පිටුවහල් කිරීමට ආගමන විගමන දෙපාර්තමේන්තු නිලධාරීන් ඊයේ (24) සවස පියවර ගෙන තිබේ.

ඔහු තුර්කියේ ඉස්තාන්බුල් නුවර සිට පැමිණි තුර්කි ගුවන් සේවයට අයත් ගුවන් යානයකින් කටුනායක ගුවන් තොටුපළ වෙත පැමිණ ඇත.

ලංකාවට ඇතුළුවීමේ දී මොහු ලබා ගෙන තිබූ වීසා බලපත්‍රය සහ ඔහු විසින් අනිවාර්යයෙන්ම ගුවන් තොටුපළේ දී සම්පූර්ණ කළ යුතු ගොඩ බැසීමේ අවසර පත්‍රය පරීක්ෂා කළ ආගමන විගමන නිලධාරීවරයාට මෙම තරුණයා මෙරට සංචාරය කරන ප්‍රදේශ සහ එහිදී ඔහු නවාතැන් ගන්නා හෝටල් පිළිබඳව කිසිදු සටහනක් නොවීම මත සැකයක් ඇති වී මොහු පිළිබඳව වැඩිදුර විමර්ශන කටයුතු ආරම්භ කර තිබේ.

එහිදී මෙම තරුණයාට ඉංග්‍රීසි බසින් පැහැදිලිව ඒවාට පිළිතුරු දීමට නොහැකි වී ඇති අතර කෙටි වචන පමණක් යොදා ගෙන පිළිතුරු දීමට උත්සාහ ගෙන තිබේ .

ගුවන් තොටුපළ සේවයෙහි නියැලී සිටි ප්‍රධාන ආගමන විගමන නිලධාරීවරයා මෙම තරුණයාගෙන් ඉතාලි භාෂාවෙන් ප්‍රශ්න කිරීම් ආරම්භ කළ ද මෙම තරුණයාට ඒ කිසිවකටත් පිළිතුරක් ලබා දීමට අපොහොසත් වූයේ  ඔහු ඉතාලි බස කිසිසේත්ම නොදත් නිසාය.

මේ අතර ඉතාලියේ තමන් ඉගෙන ගන්නා පාසලක් මගින් නිකුත් කළ ලියවිල්ලක් ගුවන් තොටුපළ ආගමන විගමන නිලධාරීන් වෙත ඉදිරිපත් කළ ද එහි සඳහන් කිසිවක් පිළිබඳව ද පැහැදිලි කිරීමට ඔහු අපොහොසත් විය.