(අංජුල මහික වීරරත්න)    
                               
2015 වසරේ සිට 2018 දක්වා සිදුවූ දූෂණ සෙවීමට පත් කළ ජනාධිපති කොමිසම විසින් ඔක්තෝබර් මස 26 දින සිට දින 51 කාලයක් මහින්ද රාජපක්ෂ මහතා අග්‍රාමාත්‍යධුරය දැරූ කාලයේ වූ දූෂණ පිළිබඳව ද සෙවිය යුතු බව උපාය මාර්ගික සංවර්ධන හා ජාත්‍යන්තර වෙළෙඳ නියෝජ්‍ය අමාත්‍ය නලින් බණ්ඩාර මහතා ප්‍රකාශ කළේය.  
                                             
ජනාධිපති මෛත්‍රීපාල සිරිසේන මහතා 2015 ජනවාරි සිට 2018 ඔක්තෝම්බර් 26 තෙක් මෙන් ම දින 51ක කාලයේත්, අදත් රජයේ ප්‍රධානියා ලෙස කටයුතු කරන බැවින් කොමිසමට පූර්ණ සහය දීමට ජනාධිපතිවරයාට සිදුවනු ඇතැයි ද නියෝජ්‍ය ඇමතිවරයා කීවේය.     
                    
නියෝජ්‍ය ඇමතිවරයා මේ බව සඳහන් කළේ අරලියගහ මන්දිරයේදී අද(24) පෙරවරුවේ පැවැති ආණ්ඩු පක්ෂ මැති ඇමතිවරුන් හා පසුපෙළ මන්ත්‍රීවරුන්ගේ අදහස් පළ කිරීමේ හමුවේදීය. 
                           
හිටපු ජනාධිපති මහින්ද රාජපක්ෂ මහතාගේ පුත් රෝහිත රාජපක්ෂ මහතාගේ විවාහ මංගලයට සහභාගීවීම සඳහා මැදමුලනය යාමට පෙර අග්‍රාමාත්‍ය රනිල් වික්‍රමසිංහ මහතා ආණ්ඩු පක්ෂ මැති ඇමතිවරු සමඟ අදහස් හුවමාරු කර ගනු ලැබීය. හිටපු ජනාධිපති පුතුගේ විවාහ මංගල්‍යයට අග්‍රාමාත්‍යවරයා සමඟ මුදල් ඇමති මංගල සමරවීර, රාජ්‍ය පරිපාලන හා ආපදා කළමානාකරණ ඇමති රංජිත් මද්දුම බණ්ඩාර, මහාමාර්ග හා මාර්ග සංවර්ධන ඇමති කබීර් හෂීම්, වරාය හා නාවුක කටයුතු ඇමති සාගල රත්නායක යන මහත්වරු ද සහභාගී වූහ.