අංජුල මහික වීරරත්න
 
ප්‍රජාතන්ත්‍රවාදය ඉල්ලාගෙන ජනබල මෙහෙයුමෙන් ලබන සඳුදා (17) කොළඹට එන ජනතාව ප්‍රජාතන්ත්‍රවාදය තහවුරු කරන තුරු නැවත ගම් රටවලට නොයන බව එක්සත් ජාතික පක්ෂයේ මාධ්‍ය ප්‍රකාශක පාර්ලිමේන්තු මන්ත්‍රී හරීන් ප්‍රනාන්දු මහතා පැවසීය.

ජනබල මෙහෙයුමෙන් ලක්ෂ ගණනින් කොළඹට එන ජනතාව ඔක්තෝබර 26 වැනිදාට පෙර තිබූ තත්ත්වයට නැවත රට පත්කරන තුරු කොළඹින් නොයන බව කී හරීන් ප්‍රනාන්දු මහතා ජනබල මෙහෙයුම යනු නොනවතින අරගලයක් බවද කීය.

ජනාධිපති සිරිසේන මහතා හැසිරෙන ආකාරය දිගින් දිගටම අත්තනෝමතික ඒකාධිපති ස්වරූපකට පරිවර්තනය වී ඇති හෙයින් නැති පුද්ගලයකුට රට වනසන්නට ඉඩ දෙන්නට හැකියාවක් නැති බව ප්‍රජාතන්ත්‍රවාදය අගයන සියලු රටවැසියන්ගේ අදහස වී තිබෙන බවද ඔහු වැඩිදුරටත් සඳහන් කළේය.

කොළඹට එන රටේ ලක්ෂ ගණනක් වන බහුතර ජනතාව ජනාධිපතිවරයා උත්තර දෙන තුරු නැවත ගම්බිම් බලා නොයනු ඇතැයි ද හරීන් ප්‍රනාන්දු  මහතා කීය.

එක්සත් ජාතික පෙරමුණට අමතරව පක්ෂ පාට නැති ජනතාව ප්‍රජාතන්ත්‍රවාදය නම් වූ පොදු අරමුණ වෙනුවෙන් ස්වේච්ඡාවෙන් ම පෙළ ගැසී සිටින බව කී හරීන් ප්‍රනාන්දු මහතා ජනාධිපතිවරයා රටේ බහුතර ජනතාවකට උත්තර බැඳීමට සූදානම් වී සිටිනු ඇතැයි තමා බලාපොරොත්තු වන බවද පැවසීය.