කැළි කසළ කළමනාකරණය වෙනුවෙන් පුහුණු සහ නිරීක්ෂණ කටයුතු සඳහා පසුගිය වසර 5 තුළ විදේශ ගතවූ නිලධාරීන් පිළිබඳව වාර්තාවක් ලබාදෙන්නැයි ජනාධිපති මෛත‍්‍රීපාල සිරිසේන මහතා මධ්‍යම පරිසර අධිකාරියට ඊයේ (25) නියෝග කළේය.

මේ අතර කුණු කසළ කළමනාකරණය සඳහා පළාත් පාලන ආයතන සකස් කර ඇති සැලසුම් ඉදිරිපත් කරන්නැයිද ජනාධිපතිවරයා නිලධාරීන්ට උපදෙස් දුන්නේය.

මේ අතර සියලූ පළාත් සහකාර කොමසාරිස්වරුන්ට තමා හමුවීමට කැඳවීමක් කරන්නැයිද ජනාධිපතිවරයා නිලධාරීන්ට උපදෙස් දුන්නේය. ජනාධිපතිවරයා මෙම උපදෙස් ලබා දුන්නේ කොළඹ සහ තදාසන්න

ප‍්‍රදේශවල කසළ කළමණාකරණය විධිමත් කිරීම පිළිබඳව ජනාධිපති මෛත‍්‍රීපාල සිරිසේන මහතාගේ ප‍්‍රධානත්වයෙන් ජනාධිපති කාර්යාලයේ ඊයේ පැවැති සාකච්ඡාවකදීය.

මීතොටමුල්ල කසළ කන්ද නායයෑමෙන් විපතට පත් පවුල් සඳහා තාවකාලික නිවාස ලබාගැනීම වෙනුවෙන් මසකට රුපියල් 50,000 බැගින් මාස තුනක කාලයක් ගෙවීමට නියමිත මුදල, එකවර එම පවුල් වෙත ලබාදෙන ලෙස ජනාධිපතිවරයා අදාළ නිලධාරීන්ට උපදෙස් දුන්නේය. තාවකාලික නිවාස ලබාගැනීමේදී ගෙවිය යුතු අත්තිකාරම් මුදල් ගැටලූ මගහරවා ගැනීම මෙමගින් අපේක්ෂා කෙරේ.

නාගරික සංවර්ධන අධිකාරියේ නිලධාරීන් සඳහන් කර සිටියේ මීතොටමුල්ල කසළ කන්දේ අවදානම මේ වනවිට පාලනයට යටත්කර තිබෙන බවත් ඉදිරි මාස දෙකක කාලය තුළ ඒ සඳහා අවසන් තීරණයකට එළැඹෙන බවත්ය.

කසළ කළමනාකරණය වෙනුවෙන් කොළඹ නගර සභාව ඉදිරි කාලයේදී අනුගමනය කිරීමට අපේක්ෂා කරන ක‍්‍රියාමාර්ග පිළිබඳවද මෙහිදී අදහස් ඉදිරිපත් වූ අතර ඒ අනුව ඉදිරියේදී කසළ කඳු නිර්මාණය වීමට කිසිදු ඉඩක් නොතබන බවද නිලධාරීහු ජනාධිපතිවරයාට සහතික වූහ. මේ අවස්ථාවට අමාත්‍යවරුන් වන සුසිල් පේ‍්‍රමජයන්ත, අනුර ප‍්‍රියදර්ශන යාපා, පාඨලී චම්පික රණවක, සජිත් පේ‍්‍රමදාස, ෆයිසර් මුස්තාෆා, සාගල රත්නායක, වජිර අබේවර්ධන, නියෝජ්‍ය අමාත්‍ය ලසන්ත අලගියවන්න, පාර්ලිමේන්තු මන්ත‍්‍රී එස්.එම්. මරික්කාර් යන මහත්වරුද ජනාධිපති ලේකම් පී.බී. අබේකෝන් මහතා සහ අමාත්‍යාංශ ලේකම්වරුන් ත‍්‍රිවිධ හමුදාපතිවරුන් පොලිස්පති ඇතුළු රාජ්‍ය නිලධාරීහු පිරිසක්ද එක්ව සිටියහ.