(ආරියරත්න රණබාහු සහ සුජිත් හේවාජුලිගේ)

පළාත් සභා මැතිවරණය පැවැත්විය යුතු ක්‍රමය පිළිබඳව ලබන ඔක්තෝබර් අවසන් වීමට පෙර තීරණයකට පැමිණිය හොත් ලබන වසරේ ජනවාරි (5) වැනි දා එම මැතිවරණය පැවැත්වීමට හැකි බව මැතිවරණ කොමිසම් සභාවේ සහ සීමානීර්ණ කොමිසම් සභාවේ සභාපති දෙපල පාර්ලිමේන්තු සංකීර්ණයේ අද (20) පැවති පක්ෂ නායක රැස්වීමේ දී පැවසූහ.

මෙම පක්ෂ නායක රැස්වීම කතානායක කරු ජයසූරිය මහතාගේ ප්‍රධානත්වයෙන් පාර්ලිමේන්තු සංකීර්ණයේ දී අද (20) පෙරවරුවේ පැවැත්විණි. 

ඒ සඳහා අගමැති රනිල් වික්‍රමසිංහ මහතා විපක්ෂ නායක ආර්. සම්බන්දන් ෆයිසර් මුස්තාපා, නිමල් සිරිපාල සිල්වා, රවුෆ් හකීම්, මලික් සමරවික්‍රම, දිනේෂ් ගුණවර්ධන, ඩග්ලස් දේවානන්ද, අනුර කුමාර දිසානායක සහ අමීර් අලි යන මැති ඇමැතිවරු සහ පක්ෂ නායකවරු සහභාගී වුහ.

ඊට අමතරව කතානායකවරයාගේ ආරාධනය පරිදි මැතිවරණ කොමිෂන් සභාවේ සභාපති මහින්ද දේශප්‍රිය සහ සීමානීර්ණ කොමිසන් සභාවේ සභාපති කේ. තවලිංගම් යන මහත්වරුන් ද එක්ව සිටියහ.