(රංජිත් රාජපක්ෂ)                     

ශක්තිමත් එක්සත් ජාතික පක්ෂය තුළ මතභේද ඇති කර කඩා වෙන් කිරිම තුළින් රාජපක්ෂ කඳවුර ශක්තිමත් වන බව එක්සත් ජාතික පක්ෂයේ ජාතික සංවිධායක සහ නුවරඑලිය දිස්ත්‍රික් අපේක්ෂක නවින් දිසානායක මහතා පැවසීය.

ගිනිගත්හේන නගරයේ අද (25) පැවති ජන හමුවකදී නවින් දිසානායක මහතා මේ බව පැවසීය.

රටේ නායකයින් ගණනාවක් බිහි කළ ශක්තිමත් එක්සත් ජාතික පක්ෂයේ තවදුරටත් ශක්තිමත් නායකයින් රැසක් රැඳී සිටින බවත් එක්සත් ජාතික පක්ෂයෙන් වෙන් වී ගිය කොටසක් කිසිඳු ප්‍රතිපත්තියක් නොමැතිව රටේ පාලන බලය ලබා ගැනීමට උත්සහ කරන බවත් එය කිසිසේත් ඔවුන්ට සිදු කළ නොහැකි බවත් නවින් දිසානායක මහතා පැවසීය.

මහ මැතිවරණයේදි සමගි ජනබලවේගය මන්ත්‍රී ධූර කිහිපයක් ලබා ගන්නා බවත් එසේ තේරි පත් වන මන්ත්‍රීවරුන් අනිවාර්යෙන්ම රාජපක්ෂ කඳවුර ශක්තිමත් කිරීමට පිහිටුවන රජයත් සමඟ එක්වන බවත් නවින් දිසානායක මහතා සඳහන් කළේය.

සමගි ජන බලවේගය සමඟ එක් වී සිටින වැඩි පිරිසක් බලය සහ තනතුරු නොමැතිව දේශපාලනයේ රැඳී සිටිමට නොහැකි පිරිසක් බවත් එම පිරිස මැතිවරණයෙන් ජයගෙන ශ්‍රී ලංකා නිදහස් පොදු ජන සන්ධානය පිහිටුවන රජයට අනිවාර්යෙන්ම එක්වන බවත් නවින් දිසානායක මහතා පැවසීය.

තමන් මහ මැතිවරණයක් සඳහා ඉදිරිපත් වන අවසන් අවස්ථාව බවත් එක්සත් ජාතික පාක්ෂිකයෙක් වශයෙන් දේශපාලනයේ රැඳී සිටින බවත් නවින් දිසානායක මහතා වැඩිදුරටත් සඳහන් කළේය.