(දයාරත්න ඇඹෝගම)

ශ්‍රී ලංකා නිදහස් පක්ෂය ජාතික ආණ්ඩුවේ පාර්ශ්වකරුවෙක් ලෙස කටයුතු කරන නිසා ආර්.සම්බන්ධන් මැතිතුමන්ව විපක්ෂ නායක ධූරයට පත් කළා.ඉදිරියටත් සම්බන්ධන් මහතා විපක්ෂ නායක ධූරය හොබවන බව ශ්‍රී ලංකා නිදහස් පක්ෂ ජාතික සංවිධායක අමාත්‍යය දුමින්ද දිසානායක මහතා පැවසීය.

අනුරාධපුරයේ පැවති මාධ්‍ය හමුවකදී අද (07) ඒ මහතා මේ බව පැවසීය.

එහිදී වැඩිදුරටත් අදහස් දැක්වූ අමාත්‍යය දුමින්ද දිසානායක මහතා මෙසේද පැවසිය.

    ‘‘විපක්ෂ නායක ධූරය සම්බන්ධයෙන් කිසිදු ගැටලුවක් නෑ. ශ්‍රී ලංකා නිදහස් පක්ෂය ජාතික ආණ්ඩුවේ පාර්ශ්වකරුවෙක් ලෙස කටයුතු කරන නිසා සම්බන්ධන් මැතිතුමන්ව විපක්ෂ නායක ධූරයට පත් කළා.

ඉදිරියටත් ආර්.සම්බන්ධන් මැතිතුමන්ම තමයි විපක්ෂ නායක ධූරය හොබවන්නේ.විපක්ෂ නායකකම ඕන ඕන වෙලාවට වෙනස් කරන්න කියන එක ඒකාබද්ධ විපක්ෂය පැත්තෙන් ඒ අයගේ දේශපාලන උපක්‍රමයක් විදිහටයි පාවිච්චි කරන්නේ.

ඒ අය ඊළඟ ජනාධිපති අපේක්ෂකයා කවුද කියන එක සම්බන්ධයෙන් රාජපක්ෂවරුන් අතරේ තරඟයක් ඇති වූ වෙලාවේ ඒකාබද්ධ විපක්ෂය බෙදුනා.

ඒ වගේම රටේ ජනතාවගෙන් අප්‍රසාදය ආවා.කුමාර වෙල්ගම මැතිතුමන් එහෙම පැහැදිළිවම කිව්වා පැන්ෂන් ගියපු හමුදා නිලධාරියෙක් මේකට සුදුසු නෑ කියලා.ඒ වගේම නීතියෙනුත් ඒ අයට බෑ කියන කාරණාව ඔප්පු වෙලා තියෙනවා.

ඒ වගේම ඒකාබද්ධ විපක්ෂය අභ්‍යන්තරයේ ඇති වූ ප්‍රශ්නය වෙනත් පැත්තකට යොමු කිරීමේ අරමුණින් තමයි දිනේෂ් ගුණවර්ධන මහතාගේ නම යෝජනා කළේ.

මේක ඒ අය ඇතුලේ බේරා ගන්න ඕන ප්‍රශ්නයක්.හැබැයි ඒ අය මේක ජාතික ප්‍රශ්නයක් බවට පත් කරගෙන තමන්ගේ අභ්‍යන්තරයේ තියෙන ප්‍රශ්නයට විසිදුමක් ලැබෙයි කියලා ප්‍රශ්නය වෙනත් මානයකට යොමු කරන්න තමයි මේ විපක්ෂ නායක කමට යෝජනාවන් ගේන්නේ.

මහින්ද රාජපක්ෂ මහතා නැවත බලයට ගෙන ඒමට කවුරුන් උත්සහ කළත්, ඉතාම පැහැදිලිව මහින්ද රාජපක්ෂ මහත්තයාට නැවත ජනාධිපතිවරණයකට ඉදිරිපත් වෙන්න බෑ.

ඒක මේ රටේ නීතිය, පුද්ගලයින්ට අවශ්‍යය විදිහට රටේ නීතිය වෙනස් කරනවා නම් ඒක රට ව්‍යාකූල වෙන්න හේතුවක්.පුද්ගලයින්ට අවශ්‍යය විදිහට නෙමෙයි රටේ බහුතර ජනතාවකට අවශ්‍ය ලෙස රටේ අනාගතයට බලපාන විදිහට රටේ අනාගතය වෙනුවෙන් තමයි නීතී රීතී වෙනස් විය යුතු වන්නේ.

ඒ නීති දැන් ක්‍රියාත්මක වෙන නිසා කවුරුන් උත්සහ කළත් මහින්ද රාජපක්ෂ මහතාට  නැවත ජනාධිපති විය නොහැකියි.ඒකාබද්ධ විපක්ෂය තුළ විශාල අර්බුධයන් මතු වෙලා තියෙනවා. රාජපක්ෂවරුන්ට කැමති හා අකමැති පිරිස් ඒ අතර ඉන්නවා.

ඒ වගේම නොවැම්බර් 21 අපි කිව්ව මතයන් එක්ක ඉන්න අය එතන ඉන්නවා.ඒකාබද්ධ විපක්ෂය අභ්‍යන්තරයේ ඇති වී තිබෙන ප්‍රශ්න දැන් ටික ටික එළියට එනවා. කොන්ද කෙලින් තියන අයට අපි ආරාධනා කරනවා කුමාර වෙල්ගම මැතිතුමන්  වගේ දැන් හරි කෙලින් කථා කරලා රට වෙනුවෙන් ඉදිරියට පැමිණෙන ලෙස‘‘ අමාත්‍යවරයා මෙහිදි පැවසීය.